ASNN – Shqipëria e Nën-21-vjeçarëve do të zhvillojë të premten ndeshjen e dytë ndaj Sllovenisë në fushë të huaj, të vlefshme për Eliminatoret e Kampionatit Evropian 2023 të kësaj grupmoshe. Skuadra është grumbulluar që prej ditës së diel në qytetin e Durrësit, ku po stërvitet intensivisht, teksa pritet që të enjten të niset drejt Sllovenisë. Në prag të kësaj sfide, në një konferencë për mediat kanë dalë dy futbollistët, Jurgen Çelhaka dhe Jorgo Pëllumbi, të cilët kanë folur në lidhje me ndeshjet që Shpresat do të zhvillojnë këto ditë.
Jurgen Çelhaka shprehet se grupi gëzon harmoni të plotë, teksa shprehet se drejt Sllovenisë kuqezinjtë do të nisen me qëllimin për të marrë tre pikët dhe se fokusi për momentin është vetëm te ndeshja e parë. Ai flet edhe për synimet e skuadrës për të arritur vendin e dytë si dhe objektivat për të ardhmen e tij në aspektin personal. “Skuadrën e shikoj shumë mirë. jemi të gjithë lojtarët, kjo është e rëndësishme, – ka thënë ai fillimisht. – Nuk kemi probleme shëndetësore, as dëmtime. E shikoj grupin në harmoni, pasi vijmë nga dy fitore të rëndësishme që kemi marrë.
“Dhe shpresoj të vazhdojmë aty ku e kemi lënë, – ka vijuar futbollisti kuqezi. – Është e vërtetë që kemi marrë një tre pikësh me shumë vlerë me Slloveninë, kur kemi luajtur në shtëpinë tonë. Por të gjithë ata që e kanë parë ndeshjen, e kanë parë që kemi vuajtur shumë për ta marrë atë tre pikësh. Është një ekip shumë i fortë. Nëse e vlerësojmë siç e vlerësuam këtu në Shqipëri, besoj se do t’i marrim tre pikët edhe aty. Ky është qëllimi jonë.” Më tej, Çelhaka ka folur edhe për Kosovën, duke theksuar: “Është një ekip që duhet vlerësuar”.
“Ka lojtarë shumë të mirë, por ne jemi më shumë të fokusuar te Sllovenia, pastaj do mendojmë ndeshjen e radhës, – ka vijuar ai. A e mendojmë vendin e dytë? Normalisht që e mendojmë. Kemi marrë 9 pikë, kemi fituar ndaj Sllovenisë, kemi një grup me lojtarë shumë cilësorë, si individualisht, por edhe si grup. Do ta synojmë vendin e dytë deri në fund.” Në mbyllje futbollisti i ri ka folur edhe për ecurinë me klubin e tij. “Deri tani mirë, – ka sqaruar Çelhaka. – Nuk kam minutat e nevojshme pasi dihet që kam bërë një transferim nga Shqipëria jashtë saj.”
“Por mendoj se po përshtatem shumë mirë. Për momentin jam i fokusuar te Kombëtarja, të ndihmoj ekipin Kombëtar që të arrijë objektivat”, – ka përfunduar futbollisti i Shpresave të Shqipërisë.
