ASNN – Që nga data 24 shtator, në Batumi të Gjeorgjisë po zhvillohet eventi me i madh i shahut në planet, Olimpiada Botërore. Në konkurrimin e hapur për meshkuj, në garë janë 185 ekipe përfaqësuese nga e gjithë bota, midis të cilave edhe Shqipëria, e cila përfaqësohet me Mjeshtrin e Madh, Erald Dervishi, dhe Mjeshtrat Ndërkombëtarë Dritan Mehmeti, Llambi Pasku, Franc Ashiku dhe Ilir Seitaj.
Pas 10 tureve të para, skuadra kuqezi ndodhet në kuoten e 12 pikëve (5 fitore, 2 barazime dhe 3 humbje) dhe më së fundi ka triumfuar me rezultatin 3-1 ndaj Guatemalës. Në prag të ndeshjes së fundit, ku shorti e ka vënë përballë skuadrës mjaft të fortë të Letonisë, ekipi i shahistëve shqiptarë renditet i 55-ti midis 185 ekipeve pjesëmarrës.
Në ecurinë e deritanishme vlejnë të përmenden fitoret ndaj Meksikës dhe Porto Rikos, me të njëjtin rezultat 3-1, si dhe barazimi historik 2-2 me një prej skuadrave më të mira të botës, Hungarinë. Nga mjeshtrat kuqezi, figurë më të mirë pas 10 përballjeve e ka bere Llambi Pasku, i cili i ka dhënë ekipit 7.5 pikë. Sa i përket skuadrës tonë të femrave, duhet theksuar se, në 9 turet e zhvilluara, kanë zhvilluar një garë të mirë, madje përtej pritshmërive.
Aktualisht Shqipëria e femra është në kuoten e 10 pikëve, pas 5 fitoreve dhe 4 humbjeve dhe ndodhet në vendin e 61-të midis 150 skuadrave në garë. Shahistet kuqezi ia kanë dalë të fitojnë ndaj skuadrave te forta si Suedia apo Venezuela dhe çdo rezultat pozitiv në dy turet e mbetura do të përbënte sukses në renditjen përfundimtare, duke u krahasuar me klasifikimet ne Olimpiadat paraardhëse.
Midis Mjeshtreve shqiptare të shahut vlen të përmenden Rozana Gjergji dhe Eglantina Shabanaj për paraqitjen e tyre në këtë Olimpiadë.
