ASNN – Pas Evangjeli Velit, një tjetër peshëngritës shqiptar do të ngjitet sonte në pedanën e Lojërave Olimpike “Rio 2016”, duke synuar edhe zonën e medaljeve, ndonëse kjo nuk do të jetë e lehtë. Briken Calja do të konkurrojë sonte në baterinë A të kategorisë së peshës trupore deri në 69 kg, që do të zhvillohet në mesnatë.

I ka provuar të gjitha në karrierën e tij, por sonte Briken Calja synon kulmin, kur të ngjitet në mesnatë, me orën e Tiranës, në pedanën e Rios, për të provuar edhe një herë fatin, duke shpresuar në misionin e vështirë shqiptar të medaljes olimpike në peshëngritje.

Ai ka shijuar medalje në nivel kombëtar dhe ndërkombëtar, ka kapërcyer edhe një pezullim për shkak të dopingut, duke u rikthyer sërish më i fortë dhe duke qenë sportisti i vetëm, pas 3 viteve të errëta për shtangën kuqezi, që kërkon të mbajë lart flamurin e këtij sporti në Lojërat Olimpike.

Ndryshe nga Veli, e cila përfitoi nga problemet e peshëngritjes ruse me dopingun, Calja u kualifikua për në Olimpiadë falë renditjes së tij më të mirë në Botërorin e Hjustonit, duke fituar, duelin, në “thonjëza”, me Erkand Qerimajn, sa i përket një bilete në Lojërat e 31-ta Olimpike Verore.

Briken Calja do të konkurrojë sonte në baterinë A të kategorisë së peshës trupore deri në 69 kg, që do të zhvillohet në mesnatë, dhe kjo garë do të sillet për sportdashësit, sikundër e gjithë kjo Olimpiadë e 31-të, drejtpërdrejt nga Rrjeti i Radio-Televizionit Shqiptar.