ASNN – Reali i Madridit, “padron” në Spanjë. Shpartallon Hironën 4-0 në “Bernabeu” dhe shkëputet +5 pikë në krye. Ishte padyshim përballja e kreut dhe Reali i Madridit ka treguar se e meriton plotësisht atë këtë sezon, teksa ka shpartalluar të shtunën Hironën me shifrat 4-0. Tani Reali është 5 pikë përpara Hironës dhe 11 para Barcelonës, që ka një ndeshje më pak, një hendek ky që po zgjerohet dhe duket gjithnjë e më i pakalueshëm.
Reali i Madridit i ka dëshmuar Hironës se mbetet padronia e kampionatit të këtij sezoni në Spanjë, teksa skuadra e trajnerit Karlo Ançeloti, me një mbrojtje të riorganizuar, por me një Vinisius të rikuperuar, mbizotëron në “Bernabeu”, duke mposhtur skuadrën katalane me shifrat 4-0. Duke fituar sfidën në krye të La Ligës, “Los Blancos” fitojnë terren më tej në renditje dhe, me një demonstrim tjetër force dhe sigurie të ofruar, gjithashtu duke pasur parasysh ngadalësimin e vazhdueshëm të ndjekësve, ata duket se kanë nisur arratisjen.
Braziliani Vinisius Zhunjor ka shpalosur një nga paraqitjet e tij më të mira që prej veshjes së fanellës së bardhë, teksa e shënoi golin e epërsisë pas 6 minutash lojë dhe dha pasimin e fundit për golin e dytë, të realizuar nga Bellingami në minutën e 35-të. Me epërsinë e dyfishtë të madrilenëve do të mbyllet pjesa e parë, por edhe në të dytën është sërish braziliani që shërben për anglezin, që realizon të dytin vetjak dhe të 3-tin për Realin.
Në fund, Vinisius mer pjesë edhe në golin e 4-0-s, të nënshkruar nga Rodrigo, teksa e ka nisur bashkëkombasin e tij drejt portës me një prekje klasi dhe saktësie. Madje Reali i Madridit kishte edhe luksin të shpërdoronte një 11-metërsh në minutën e 90-të, teksa Hoselu u ndal nga shtylla.
