ASNN – Calja, Qerimaj, Godelli, Shoraj dhe Karina, 5-shja kuqezi në Batum, trajnerë Bishanaku, Kovaçi dhe Toska. Nga data 6, deri më 13 prill 2019, në Batum të Gjeorgjisë do të zhvillohet Kampionati Evropian i Peshëngritjes për Të Rritur, në të cilin do të marrë pjesë edhe Shqipëria. Dhe ditët e fundit, Federata Shqiptare e Futbollit ka përcaktuar edhe përbërjen e delegacionit që do të përfaqësojë shtangën kuqezi në këtë veprimtari kontinentale.
Organizmi që qeveris shtangën në vend ka vendosur që të dërgojë në Evropianin gjeorgjian 5 sportistët më të spikatur të saj. Kështu, në kategorinë e peshës trupore deri në 73 kg, do të konkurrojë kampioni i 3-fishtë i Evropës, Briken Calja, i cili shkon në këtë kampionat duke synuar sërish podiumin dhe medaljet. Po kështu shkon edhe medalisti i bronztë i botës, Erkand Qerimaj, i cili bëri një paraqitje të mirë në Kupën e Shqipërisë, që u mbajt në mesin e muajit të shkuar.
Qerimaj do të konkurrojë në kategorinë e peshës trupore deri në 81 kg, aty ku do të kemi edhe një përballje kuqezi midis tij dhe Daniel Godellit, një betejë që shpresohet t’i sjellë medalje Shqipërisë nga këta dy peshëngritës së spikatur. Ndërkaq, në kategorinë e peshës trupore deri në 89 kg do të garojë shtangisti Krenar Shoraj, ndërsa në atë të kategorisë së peshës trupore deri në 102 kg do të konkurrojë peshëngritësi tjetër kuqezi, Endri Karina.
Të 5 sportistët kuqezinj që do të garojnë në Batum janë meshkuj, teksa dy sportistet më të spikatura femra, Romela Begaj dhe Evangjeli Veli, janë të pezulluara për shkak të dopingut. Delegacioni kuqezi në Gjeorgji do të kryesohet nga presidenti i Federatës Shqiptare të Peshëngritjes, Theodhor Masllavica, dhe në përbërje do të ketë edhe Sekretarin e Përgjithshëm të saj, Edlir Memaj, por edhe 3 trajnerët Sokol Bishanaku, Zef Kovaçi dhe Leonard Toska.
