ASNN – Peshëngritja shqiptare ka ngritur siparin e vitit 2024 me Kampionatin Kombëtar për Të Rritur dhe të Rritura, aty ku kanë shkëlqyer Enkileda Carja dhe Ertjan Kofsha, të cil ët janë shpallur përkatësisht sportistja dhe sportisti më i mirë, ndërsa si ekipe, “kampionë” janë shpallur Partizani për femra dhe Tirana për meshkuj.

Kështu, organizmi që qeveris shtangën në vend, Federata Shqiptare e Peshëngritjes, ka çelur sezonin e garave për vitin 2024, teksa të shtunën është mbajtur në kryeqytet Kampionati Kombëtar për të rritur. Në këtë eveniment kombëtar u ngjitën në pedanë dhe garuan 60 sportistë, të cilët përfaqësonin klube të ndryshme të vendit.

Siç është bërë e modës gjatë këtyre viteve të fundit, teksa nuk është zhvilluar në asnjë pallat apo sallë sportive të kryeqytetit, edhe këtë herë kjo veprimtari madhore, edhe pse kombëtare, u zhvillua në bodrumin e Parkut Olimpik të Tiranës, aty ku ndodhet palestra e Peshëngritjes.

Duhet theksuar se ky kampionat pati edhe mungesën e dy emrave të mëdhenj të shtangës shqiptare të meshkujve, Briken Calja dhe Erkand Qerimaj, të cilët zgjodhën të mos merrnin pjesë.  Dhe, në mungesë të tyre kanë spikatur një numër elementësh të rinj dhe premtues të shtangës.

Ndonëse bëhet fjalë për veprimtarinë më të rëndësishme në rang kombëtar, Federata Shqiptare e Peshëngritjes ka bërë të ditur se dy peshëngritësit e spikatur, ai shtërmenas dhe ai shkodran, kanë zgjedhur që të ruajnë forcat për Kampionatin Evropian për Të Rritur dhe Të Rritura që do të mbahet në shkurt të këtij vitit në Bullgari.