ASNN – Kampionati Kombëtar për Të Rritur dhe të Rritura u zhvillua të shtunën në Tiranë dhe në garën e femra spikati Enkileda Carja, e cila vetëm pak ditë para kampionatit u transferua te skuadra e Teutës. Ndonëse ende nuk ka bërë 16 vjeç, Carja, që stërvitet nga trajnerja Eglantina Kalemi, meritoi vlerësimin e sportistes më të mirë të këtij kampionati.
Shtangistja e talentuar dhe premtuese nga Elbasani, kampione dhe rekordmene e Europës me moshat, konkurroi në kategorinë e peshave 64 kg. Ajo regjistroi 82 kg në stilin e shkëputjes dhe 100 kg në shtytje, duke e mbyllur dygarëshin me 182 kg. Një paraqitje e shkëlqyer nga Carja, e cila vijon të mahnitë me rezultatet e saj, tashmë duke dominuar edhe në kampionatin e të rriturave.
Ndërkohë në rang ekipor për femra kampione u shpall skuadra e Partizanit. Vajzat e drejtuara nga trajneri Ervis Tabaku u klasifikuan në vend të parë, duke lënë pas Tiranën dhe Teutën. Ndërkaq, edhe te meshkujt triumfi në Kampionatin Kombëtar ka shkuar për një talent të madh si Ertjan Kofsha. 18-vjeçari i Shtërmenit u shpall “kampion kombëtar” në kategorinë e peshave 89 kg, gjithashtu edhe sportisti më i mirë i veprimtarisë.
Kofsha regjistroi rezultatin 155 në stilin shkëputjes dhe 185 në shtytje, për ta mbyllur dygarëshin me 340 kg. Një rezultat ky shumë i mirë i Kofshës, që tregoi se nuk është vetëm e ardhmja, por edhe e tashmja e peshëngritjes shqiptare. Ndërkohë, për sa i përket nivelit ekipor, Tirana, nën drejtimin e trajnerit Sokol Bishanaku, vijon dominim e saj në shtangë, duke u shpallur përsëri “kampione”.
