ASNN – Briken Calja e mbyll i 6-ti në botë, vetëm 4 kg në dygarësh larg medaljes në Botërorin e Turkmenistanit. Brilen Calja, kampion i trefishtë i Evropës në peshëngritje, ishte shpresa e ekipit kuqezi në Botërorin e Turkmenistanit. Sot në orën 16:00 me orën e Tiranës (20:00 me orën lokale), Calja u ngjit në pedanë në kategorinë e peshës trupore deri në 73 kg, bateria A. Kjo ishte hera e parë që Calja dhe jo vetëm ai, garonin me versionin e ri të peshave, pra të ndryshuara.
Briken Calja e nisi garën në stilin e shkëputjes me 148 kg, provë të cilën e realizoi me sukses. Në provën e dytë Calja vuri në shtangë 153 kg, duke e ngritur po me sukses dhe duke hapur rrugën të garojë për medalje në këtë stil. Por në provën e tretë e vendimtare me 157 kg, Calja nuk ia doli të mbajë lart shtangën, një peshë që do ta fuste automatikisht në zonën e medaljeve. Për rrjedhojë, Briken Calja e mbylli stilin e shkëputjes me 153 kg në vendin e shtatë.
Në këtë stil vendin e parë e zuri kinezi Zhi-xhong Shi, që ngriti 164 kg, duke bërë diferencë me konkurrentët e tjerë. Në vendin e dytë në këtë stil u rendit bjellorusi Vadzim Ligharad me 156 kg, kurse në vend të tretë kinezi Lidong Feng me 155 kg. Pra Calja ishte vetëm 2 kg larg zonës së medaljeve në këtë stil. Në garën në stilin e shtytjes, Briken Calja e nisi me 181 kg në provën e parë, të cilën e realizoi. Në provën e dytë Calja vuri në shtangë 186 kg, duke e ngritur edhe atë.
Kjo i ka mundësuar edhe një klasifikim në dygarësh brenda tetëshes së parë. Natyrisht, vendimtare do të ishte prova e tretë sepse konkurrenca u bë mjaft e madhe me hyrjen në garë të shtangistëve kinezë. Në provën e tretë Calja nuk ia doli të realizojë 189 kg, që mund ta fuste atë në dygarësh në 5-shen më të mirë. Si përfundim e mbylli garën në shtytje me 186 kg, në vend të 7-të. Në dygarësh Calja ngriti 339 kg, në vend të 6-të, po aq sa vendi i 5-të, koreanoveriori O Kang Col që ngriti në dygarësh po 339 kg.
Por aziatiku u klasifikua më mirë për shkak se e ngriti më parë këtë peshë. Nëse Briken Calja do të kishte realizuar prova të sakta, atëherë ai do të renditej në zonën e medaljeve, në vend të dytë me 345 kg. Sidoqoftë, vendi i 6-të në botë është një renditje e mirë. Duhet theksuar se kampion i botës në këtë kategori, doli kinezi Zhixhong Shi, i cili ngriti në shtytje në provën e dytë 196 kg dhe në dygarësh 360 kg, duke merituar vendin e parë në të dy stilet dhe në dygarësh.
