ASNN – Kur bëhet fjalë për një vend përfaqësuesja e të cilit ka arritur në finalen e Botërorit, siç është Franca, është e natyrshme që ethet e futbollit të kenë kapluar gjithçka dhe çdo bar apo restorant të vendosë ekranë televizivë për të ndjekur ndeshjet. Por një bar në brigjet e Senës në Paris ofron një oaz paqeje për ata që duan të shkëputen nga Botërori.
Botërori i futbollit është një mundësi e shkëlqyer për bizneset që të rrisin përfitimet e tyre, natyrisht edhe duke iu përshtatur rrymës, duke vendosur ekrane televizivë që klientët të ndjekin edhe ndeshjet teksa shijojnë pijet apo ushqimin. E për më tepër, kur bëhet fjalë për një vend përfaqësuesja e të cilit ka arritur në finalen e Botërorit, siç është Franca.
Por një bar në brigjet e Senës në Paris ofron një oaz paqeje për ata që duan të shkëputen nga Botërori. “Nuk më pëlqen termi anti-futboll se ka një nuancë negative. Ideja është më tepër për të propozuar një alternativë, – thotë pronari i Bar “Markounesë”, Arnod Séité. – Ka shumë njerëz si unë, që nuk e pëlqejnë futbollin, por duam të shkojmë në një bar edhe gjatë kësaj periudhe.”
“Por është e pamundur të mos gjesh një ekran televiziv, – vijon ai. – Kështu që ideja ime ishte që këtu nuk ka ekrane, por muzikë dhe produkte të mira.” Për pronarin e Bar “Markunesë”, gjithçka është çështje këndvështrimi: “Unë besoj që, kur shkon në një bar, është më zbavitëse të dëgjosh muzikë të mirë, të pish verë të mirë dhe, veçanërisht, të flasësh me njëri-tjetrin, sesa të ulesh përpara një ekrani e të bëhesh spektator.”
Edhe muzikanti amerikan i orkestrës së barit, Sol Rubin, thotë se është kënaqësi të luash melodi dhe këngë për njerëz që në kokën e tyre nuk kanë futbollin apo ndeshjet. Kurse për klientet si Maria, ky bar është një shans për të qenë larg etheve të futbollit, pavarsisht se ai i bën njerëzit të ndjehen mirë. Edhe për Evën, një tjetër kliente, e rëndësishme është që në këtë bar nuk ka atmosferë futbolli, por është qetësi dhe mund të çlodhesh.
