ASNN – Trajneri Shkëmbi: “I kënaqur me grumbullimin, kemi lojtarë që premtojnë për të ardhmen”. Ekipi kombëtar i Nën-19-vjeçarëve zhvilloi për herë të parë një grumbullim 3-ditor me trajnerin e ri Bledi Shkëmbi. 20 lojtarët e përzgjedhur ishin nga klubet e kampionatit shqiptar të futbollit dhe vetëm dy prej tyre vinin nga kampionati i futbollit në Kosovë.
Gjatë këtij grumbullimi në Durrës, trajneri Bledi Shkëmbi pati mundësinë të vëzhgonte nga afër gjendjen e futbollistëve të grumbulluar, teksa u zhvillua edhe një ndeshje miqësore me Teutën e Nën-19-vjeçarëve. Në një prononcim për faqeb zyrtare në Internet të Federatës Shqiptare të Futbollit (FSHF), trajneri Bledi Shkëmbi, fillimisht tregoi ndjesitë e tij në këtë grumbullim të parë me Kombëtaren e kësaj grupmoshe.
“Ndjesi të mira, patjetër pak emocion, – tha fillimisht ai. – Ishte hera e parë që u prezantova me lojtarët. Dua të theksoj që ishin futbollistë të kampionatit shqiptar. Mendoj që si hera e parë shkoi mirë, duke u stërvitur por edhe në një ndeshje miqësore që luajtëm me ekipin e Teutës së Nën-19-vjeçarëve.” Më tej, Bledi Shkëmbi tregoi se është i kënaqur nga ky grumbullim i parë me lojtarët e ftuar.
Au tha se disa futbollistë janë elementë të mirë që premtojnë për të ardhmen, duke shtuar gjithashtu se puna vijon çdo javë me projekti “Step by Step” që ndikon drejtpërdrejt në përmirësimin e çdo lojtari. “Jam i kënaqur në këtë grumbullim 3-ditor me skuadrën, me të gjithë lojtarët, me mënyrën se si u stërvitën, me seriozitet, rregull, disiplinë sepse në atë moshë dhe në çdo skuadër kjo gjë është shumë e rëndësishme”, – tha Shkëmbi.
“Patjetër që ka disa lojtarë që premtojnë për të ardhmen, në këtë moment nuk dua të përmend emra por që patjetër që ka disa që ne po i shikojmë me kujdes, – ka vijuar trajneri kuqezi. Jo më kot është dhe projekti “Step by Step” ku ne pikërisht një numër të këtyre lojtarëve e thërrasim çdo javë dhe i trajnojmë në mënyrë specifike.” Po cili është objektivi i tij?
“Patjetër që ndikon, unë mendoj që objektivi i parë është përmirësimi i këtyre lojtarëve individualisht, pasi ne më shumë punojmë nga mënyra individuale me këto lojtarë. Kjo moshë mendoj që përmirësimi duket shpejt, ndryshojnë nga muaji në muaj dhe në fund do të shikojmë se ku jemi me të gjithë këta emra”, – përfundoi prononcimin e tij trajneri i Kombëtares kuqezi, Bledi Shkëmbi.
