ASNN – Trajneri i ekipit kombëtar të Nën-19-vjeçarëve në futboll, Armando Cungu, shfrytëzoi rastin për t’u bërë ftesë, por edhe thirrje klubeve shqiptare, që të punojnë më shumë me talentet e reja dhe të sugjerojnë të gjithë elementët cilësorë që kanë në ekipet e tyre të moshave, në mënyrë që të mbahen në vëzhgim të gjithë lojtarët e vlefshëm për t’u grumbulluar në ekipet kombëtare. “Nuk mund të pretendoj për një muaj që të kem mundësinë dhe shansin për të parë të gjithë lojtarët që luajnë në Kategorinë Superiore, – ka deklaruar ai. – Kam parë pjesën më të madhe të lojtarëve që aktivizohen në pjesën e Veriut”
“Ashtu sikurse edhe kolegu im është përpjekur të vëzhgojë pjesën e Jugut, – ka vijuar shkodrani. – Kjo është edhe një ftesë që u kemi bërë të gjitha ekipeve të Superiores, duke respektuar edhe trajnerët, kubet dhe institucionet e tyre për të punuar dhe për të adresuar lojtarët që janë më të mirë, më seriozë dhe më cilësorë në ekipet e tyre. Kjo është edhe arsyeja për t’i parë, vëzhguar dhe për të përzgjedhur elementët që janë më të nevojshëm për ekipin kombëtar.” Më tej, Cungu foli dhe për vështirësitë me të cilat është përballur në këtë moment për shkak të epidemisë dhe pamundësive për të testuar lojtarë, të cilët aktivizohen në klube të huaja.
“Epindemia ka ndikuar më shumë për të krijuar një ekip kombëtar solid, me lojtarët më të mirë të mundshëm, – ka pohuar trajneri kuqezi. – Lojtarët që aktivizohen jashtë e kanë thuajse të pamundur për të ardhur në Shqipëri, jo vetëm për vështirësinë që paraqet Shqipëria që është futur në zonën e kuqe, por edhe sepse në pjesën dërrmuese të vendeve ku ata jetojnë kanë edhe një karantinë dyjavore të detyrueshme. Duke patur parasysh, që janë lojtarë të klubeve cilësore në Evropë, është shumë e vështirë që ta lënë lojtarin të grumbullohet për një ndeshje miqësore apo qoftë për një grumbullim 2-ditor për të mos thënë e pamundur për momentin.
“Kjo është keqardhja ime më e madhe, por duhet t’i përshtatemi kushteve”, – shtoi Cungu. Në fund, ai shfaqet optimist për prurjet që ofron aktualisht futbolli shqiptar, ndërsa shtoi se të gjithë duhet ta tregojnë në fushë se duhet ta meritojnë fanellën e kombëtares shqiptare. “I qëndroj bindjes se futbolli shqiptar ka lojtarë të cilët kanë vlera, duhen evidentuar dhe duhet t’u jepet mundësia për të zbritur në fushën e lojës dhe të tregojnë se e meritojnë fanellën e Kombëtares, – ka këmbëngulur ai. – Unë e shikoj me shumë kënaqësi dhe do t’i jap rëndësinë e duhur.
“Patjetër, lojtarët që aktivizohen në klube të huaja duhet të vijnë dhe duhet të tregojnë diferencë me lojtarët e Kategorisë Superiore. Në të kundërt, nëse nuk ka diferencë atëherë patjetër që do të preferohen lojtarë të cilët i shohim çdo ditë, i ndjekim çdo ditë dhe mund t’i vlerësojmë më mirë çdo ditë”, – ka përfunduar trajneri i ekipit kombëtar të Nën-19-vjeçarëve, Armando Cungu.
