ASNN – Kombëtarja kuqezi e futbollit të Nën-19-vjeçarëve ka nisur grumbullimin në prag të Eliminatoreve të Kampionatit evropian të kësaj moshe. Nën drejtimin e trajnerit Erjon Bogdani 19-vjeçarët kuqezinj po kryejnë stërvitje në Durrës. Kundërshtarët e tyre në grup do të jenë Norvegjia, Sllovakia dhe Ukraina.
Dy futbollistët e rinj, portieri Livio Malaj dhe mefushori Jurgen Çelhaka, që kanë dalë sot në konferencën për shtyp, tregojnë se i njohin kundërshtarët dhe grupi kuqezi po ecën mirë në stërvitje. Pritshmëritë janë të mëdha sidomos kur dihet që ndeshjet do të luhen në fushën tonë.
“Me të gjithë shokët e skuadrës njihemi edhe më përpara pasi kemi pasur disa grumbullime me Kombëtaren e Nën-19-vjeçarëve dhe mendoj se jemi një grup solid dhe shpresoj të ecim sa më shumë përpara, – ka thënë Çelhaka. – Duhet të mendojmë të stërvitemi sa më mirë, pasi dhe pritshmëritë i kemi të mëdha.”
“Ne luajmë në shtëpinë tonë pavarësisht që kundërshtarët janë të fortë, do të bëjmë maksimumin”, – ka përfunduar mesfushori. “Grumbullimi po ecën shumë mirë, me pjesën më të madhe të grupit njihemi, pasi u bë disa kohë që grumbullohemi, jemi të harmonizuar me njëri tjetrin, ne jemi shumë shokë”, – ka thënë portieri Malaj.
“Marrëdhënia jashtë fushe ndikon shumë edhe brenda fushës së blertë, – ka vijuar ai. – Ky fakt do na ndihmojë të ecim përpara. Shpresoj me grupin që kemi është një grup me cilësi e aq më tepër që ndeshjet do t’i zhvillojmë në Shqipëri, besoj duhet ta shfrytëzojme e sigurisht kemi nevojë për mbështetjen e tifozëve dhe besoj do ia dalim.”
“Ekipet kundërshtare kanë kualitet por me impenjimin maksimal mund tia dalim”, – ka përfunduar gardiani kuqezi. Përsa i përket konkurrencës në portë, kur në këtë rol luan edhe Marko, Malaj mendon se i takon trajnerit Bogdani për të vendosur. Ndeshjet e grupit B, ku bën pjesë edhe Shqipëria do të zhvillohen nga data 10, deri më 16 tetor 2018 në Stadiumin “Niko Dovana” në Durrës dhe Stadiumin e Kamzës.
