ASNN – Përfaqësuesja e Nën-17-vjeçarëve në futboll do të udhëtojë drejt Irlandës së Veriut, teksa më datë 27 tetor 2021 do të zhvillojë ndeshjen e parë ndaj Italisë. Më datë 30 tetor 2021, kuqezinjtë e trajnerit Ervin Bulku do të sfidojnë Skocinë dhe më datë 2 nëntor 2021 përballen më vendasit e Irlandës së Veriut. Kuqezinjtë janë në ditën e 3-të të grumbullimit për 3 ndeshjet e Eliminatoreve të “Evropianit 2022” me 24 lojtarët e ftuar nga trajneri Bulku, të cilët po stërviten rregullisht në kampin e tyre stërvitor në Durrës për turneun zyrtar.

Deri tani gjithçka ka shkuar sipas planeve dhe nuk ka probleme fizike për asnjë nga ekipi i Nën-17-vjeçarëve. Atmosfera në skuadër është shumë pozitive dhe këtë e dëshmojnë dhe prononcimet e lojtarëve të thirrur, të cilët janë shumë optimistë për paraqitjet e Kombëtares në këto eliminatore. Sulmuesi Flavio Sulejmani, i cili aktivizohet në Itali me Peruxhian, ndihet mirë në këtë grumbullim, teksa nuk e fsheh dëshirën që një ditë të jetë pjesë e Kombëtares dhe të bëhet protagonist në arenën ndërkombëtare.

“Sigurisht ndihem i lumtur që jam këtu dhe me shokët e skuadrës shkojmë shumë mirë, – ka thënë futbollisti i ri kuqezi. – Jam i emocionuar, por jam i bindur që do të bëjmë paraqitje të mira në Evropian dhe të marrim po ashtu rezultate të mira. Skuadrën e shoh në formë, objektivi ynë është ta nisim me fitore dhe të kemi sa më shumë gjëra të bukura në këtë Evropian. Dëshiroj shumë që një ditë të luaj me Kombëtaren e të rriturve dhe të bëhem një nga futbollistët më të rëndësishëm të Shqipërisë.”