ASNN – Shqipëria, “tërmet 7-ballësh” përballë Irlandës. Nën-17-vjeçaret kuqezi të trajnerit Agustin Kola e nisin me një humbje 1-7. Kështu, grupi B6 i fazës së dytë të Eliminatoreve të Kampionatit Evropian të Nën-17-vjeçareve në futboll për femra po i zhvillon ndeshjet në Tiranë dhe të martën është luajtur ndeshja e parë. Në takimin e zhvilluar në Stadiumin “Arena Kombëtare” në kryeqytet dhe të sjellë për sportdashësit drejtpërdrejt, Shqipëria është mundur 1-7 përballë Irlandës, ndërsa pjesë e grupit është edhe Izraeli.
Shqipëria e Nën-17-vjeçareve ka luajtur të martën ndeshjen e parë të fazës së dytë të Eliminatoreve të Kampionatit Evropian të kësaj grupmoshe të futbollit të femrave, duke u mundur me rezultatin e thellë, 1-7, përballë Irlandës. Pjesa e parë e takimit të zhvilluar në Stadiumin “Arena Kombëtare” në kryeqytet ka folur më tepër për skuadrën mike, që e ka gjetur rrugën e rrjetës në minutën e 25-të, me anë të Hanah O’Brajënit. Me epërsinë minimale të irlandezeve do të mbyllet pjesa e parë, ndërsa ajo e dyta do të shohë skuadrën mike të dyfishojë shifrat në minutën e 50-të, me anë Kiilin Dodit.
Ndërsa në të 70-ën Irlanda realizoi edhe golin e 3-të me Kejti Loulisë. Pavarësisht pësimit të golit të tretë, Shqipëria gjeti forcë të reagonte dhe shënoi me Xhesika Ndojin, e cila u tregua e saktë përballë portieres kundërshtare. Por 3 minuta më vonë, Irlanda shënoi sërish në të 75-ën me Sorça Melian. Ndërsa Keira Sena realizoi golin e 5-të në minutën e 82-të. Në fundin e takimit Iralanda shënoi edhe dy gola të tjerë dhe ndeshja ndaj Shqipërisë përfundoi kështu me rezultatin 7-1.
Shqipëria e Nën-17-vjeçarëve ndodhet në grupin B6 ku bën pjesë edhe Izraeli, ndërsa ndeshjet luhen të gjitha në Stadiumin “Arena Kombëtare” në Tiranë. Takimi i dytë do të luhet të premten më 23 shkurt dhe Irlanda do të përballet me Izraelin, duke nisur nga ora 11:30, ndërsa ndeshja e fundit e grupit B6 do të zhvillohet më 26 shkurt po në stadiumin “Arena Kombëtare”, ku Shqipëria do të përballet me Izraelin duke nisur nga ora 14:00.
https://www.youtube.com/live/mu0HbSKHl0Q?si=ZRQvsSTlhB8o8E06
