ASNN – Kombëtarja shqiptare e Nën-17-vjeçarëve në futboll po përgatitet në ditën e tretë të grumbullimit për tre ndeshjet e Eliminatoreve të “Evropianit 2022” me 24 lojtarët e ftuar nga trajneri Ervin Bulku, të cilët po stërviten rregullisht në kampin e tyre stërvitor në Durrës për turneun zyrtar. Deri tani gjithçka ka shkuar sipas planeve dhe nuk ka probleme fizike për asnjë nga ekipi i Nën-17-vjeçarëve. Atmosfera në skuadër është shumë pozitive dhe këtë e dëshmojnë dhe prononcimet e lojtarëve të thirrur, të cilët janë shumë optimistë për paraqitjet e Kombëtares në këto eliminatore.
Duke folur për faqen zyrtare të Federatës Shqiptare të Futbollit (FSHF) në Internet, mbrojtësi Arlind Kurti thotë se Shqipëria e Nën-17-vjeçareve duhet të synojë të renditet sa më të lart në grupin e eliminatoreve dhe të bëjë një paraqitje sa më të mirë. “Në këto ditë të para të grumbullimit ndihem shumë mirë, gjendja e grupit është shumë e mirë, – ka thënë futbollisti i ri. – Kemi nisur grumbullimi për t’u përgatitur siç duhet dhe për të shkuar në Europian me synime të qarta për të marrë atë që pretendojmë.”
“Synojmë të bëjmë sa më mirë në të treja ndeshjet dhe pse jo të mendojmë kualifikimin. Objektivi që mund të arrijë kjo skuadër mendoj se është vendi i dytë në grup. Në aspektin personal shpresoj shumë që në të ardhmen të bëhem një lojtar i Kombëtares së të rriturve dhe të jem protagonist me fanellën kuqezi”, – përfundoi shpreh Arlind Kurti. Ndërsa, sulmuesi Orsi Ageja thekson se ky grup ka shumë cilësi dhe elementë të talentuar dhe mund të synojë të bëjë gjëra të mëdha në këto Eliminatore.
“Edhe unë ndihem shumë mirë në këto ditë të grumbullimit me Kombëtaren e Nën-17-vjeçarëve, edhe grupin e shoh në gjendje dhe jam i lumtur që përgatitjet po shkojnë sipas planeve, – ka thënë ai. – Objektivi është në radhë të parë të bëjmë një paraqitje sa më të mirë, të zbatojmë sa më shumë detyrat e trajnerit dhe të japim maksimumin në fushën e lojës. Kjo skuadër mund të arrijë shumë, sepse ka cilësi të mëdha në vetvete. Synimi është të shohim sa më lart për të arritur në vendet e para të renditjes së grupit.”
“Në planin personal duhet të punoj sa më shumë për t’i ngjitur shkallët një nga një dhe të kem arritje të mëdha në karrierë”, – përfundoi futbollisti kuqezi, Orsi Ageja. Përfaqësuesja do të udhëtojë drejt Irlandës së Veriut, teksa më datë 27 tetor 2021 do të zhvillojë ndeshjen e parë ndaj Italisë. Më datë 30 tetor 2021, kuqezinjtë e Bulkut do të sfidojnë Skocinë dhe më datë 2 nëntor 2021 përballen më vendasit e Irlandës së Veriut.
