ASNN – Paris Karepi, Eriglent Prizreni e Kevi Kupi, stërvitje të përbashkët me mundësit japonezë. Sikundër ishte bërë e ditur në fillim të këtij muaji, nga data 11, deri më 19 shkurt, 3 nga mundësit më të spikatur shqiptarë, Paris Karepi, Eriglent Prizreni dhe Kevin Kupi, të shoqëruar nga trajneri i ekipit përfaqësues, Leonard Çakmashi, dhe presidenti i Federatës, Martin Biba, ndodhen në kryeqytetin e Japonisë, Tokio, për një fazë përgatitore.
Në fakt, kjo fazë stërvitore, e cila zhvillohet në qendrën olimpike të Tokios, kishte në program një stërvitje të përbashkët të 3 prej mundësve më të mirë shqiptarë me ata japoneze dhe u u mundësua nga deputeti japonez, Hiroshi Hase, ish-kampion olimpik në stilin greko-romak. Sipas informacionit që ka përcjellë për Rrjetin Radio-Televizionit Shqiptar Presidenti i i Federatës, Martin Biba, kjo fazë përgatitore po rezulton mjaft e dobishme dhe po zhvillohet në kushte optimale.
Kreu i organizmit që qeveris mundjen shqiptare ka përsëritur se kjo vizitë në Japoni, është hapi i parë i një programi stërvitor drejt Olimpiadës së vitit të ardhshëm. Në fakt, që nga mbërritja e tyre më 11 shkurt në Japoni, 3 sportistët shqiptarë i janë nënshtruar stërvitjes me ngarkesë të plotë që nis që në mëngjes herët me një vrapim të lehtë në natyrë, për të vijuar më pas me programin në palestër. Mundësi po zhvillojnë dy seanca stërvitore në ditë, duke ndërthurur ushtrimet në tapet me ushtrimet në palestër.
