ASNN – Edhe dy etapa kanë mbetur nga edicioni i këtij viti, që po zhvillohet në Arabinë Saudite. Veterani spanjoll, Karlos Sainz, e thelloi hendekun me ndjekësit në krye të renditjes së përgjithshme të pilotëve në Rellin e Dakarit, duke fituar fituar etapën e 10-të, të zhvilluar nëpër dunat e shkretëtirës Rub’el-Khali në Arabinë Saudite.
Piloti 57-vjeçar mbërriti në finish me kohën 2 orë, 3 minuta e 43 sekonda, në një etapë që, për shkak të erërave të forta, u shkurtua në 233 km, me itinerar nga Haradhi në Shubajta’, duke lënë prapa polakun Jakub Przygonski dhe afrikanojugorin Giniel de Vilier.
Sainzi përfitoi në maksimum nga problemet që patën me pajisjet orientuese dy rivalët e tij më të afërt, kampioni në fuqi, Naser Al-Atija, dhe francezi i mbiquajtur “Mr. Dakar”, Stefan Peterhansel. Ky i fundit, që e ka fituar Dakarin 13 herë, 7 herë me makinë dhe 6 herë me motor, ishte 11 minuta e 48 sekonda pas Sainzit.
Ndërsa piloti nga Katari, Al-Atija, ishte edhe më prap, 17 minuta e 46 sekonda. Kjo fitore nënkupton se, teksa kanë mbetur edhe dy etapa deri në mbyllje të këtij edicioni, Sainzi kryeson me 18 minuta e 10 sekonda më tepër sesa Al-Atija dhe 18 minuta e 26 sekonda më tepër sesa Peterhanseli.
Debutuesi në Dakar, ish-kampioni i dyfishtë i Formula 1, Fernando Alonso, humbi më tepër se një orë kohë, pasi u rrokullis dy herë me makinën e tij dhe e vazhdoi garimin pa xhamin e parë të saj. Ndërkaq, amerikani Riki Brabek e thelloi kryesimin e tij në renditjes së përgjithshme të motorëve, edhe pse në etapën e 10-të mbërriti i dyti në finish.
