ASNN – Laçi, edhe me 10 lojtarë e merr pikën. Mbyllet 1-1 në “Elbasan Arena”, Tirana ka harruar të fitojë prej 3 ndeshjesh. Dy takimet e fundit të javës së 25-të të Kategorisë Superiore janë luajtur të hënën në mbrëmje dhe në sfidën e zhvilluar në Stadiumin “Elbasan Arena” Tirana ka qenë pritëse në përballjen me Laçin. Në fakt, Tirana ka harruar të fitojë, teksa bardheblutë kanë barazuar 1-1 me kurbinasit, që luajtën për më shumë se 70 minuta me një lojtar më pak.
Në fakt, pjesa e parë e kësaj ndeshjeje është mbyllur në barazpeshë sa u përket shifrave, por jo sa i përket organikës, sepse në minutën e 18-të, Lushkja pengohet në hyrje të zonës dhe gjyqtari ndëshkon me karton të kuq Paulo Silvën, edhe pse futbollisti i kurbinasve nuk ishte lojtari i fundit. Megjithatë loja në vijim ka parë Laçin të luajë si i barabartë. Pas një pjese të parë pa gola, sfida u zhbllokua në minutën e 54-t.
Një goditje këndi për bardheblutë dhe një top i mbetur në zonë është shfrytëzuar më së miri nga Lushkja, i cili nuk ka falur me goditjen e tij të fuqishme, 1-0. Atëherë kur mendohej se gjithçka ishte në favor të bardhebluve, vjen dhe goditja e kurbinasve, të cilët nuk u dorëzuan, teksa golin e barazimit e gjetën në minutën e 78-të me Myrtën, i cili kishte vetëm disa sekonda që ishte në lojë.
Një aksion nga e djathta e sulmit dhe Myrta brenda zonës ka shfrytëzuar pasigurinë e mbrojtjes bardheblu për të vendosur barazpeshën. Mbyllet kështu në barazim 1-1 kjo sfidë dhe një tjetër mundësi e humbur për Tiranën, që mbetet në kuotën e 35 pikëve në vendin e 4-t, po aq sa Dinamo e vendit të pestë, por një pikë me peshë për skuadrën e Laçit.
