ASNN – Nis java e 20-të e Kategorisë Superiore, Kukësi mundet 1-4 në shtëpi nga Egnatia, Tirana shpërdoron në Durrës. Të premten janë luajtur dy ndeshjet e para të javës së 20-të të Kategorisë Superiore dhe, më herët, Egnatia kryesuese ka fituar thellë, 4-1, në Kukës ndaj skuadrës vendase. Ndërsa në takimin e luajtur në mbrëmje, Tirana ka shpërdoruar një epërsi dygolëshe, duke u detyruar të kënaqet me një pikë të vetme pas barazimit 2-2 në Durrës përballë Teutës.
Në takimin e luajtur në Stadiumin “Kukës Arena”, Egnatia ka treguar forcën, duke mposhtur me rezultatin 4-1 Kukësin vendas. Rrogozhinasit dominojnë pjesën e parë dhe arrijnë të shënojnë tre gola me Malotën, Fernandon dhe Gjatën. Kukësi mundohet të reagojë, por goli u Rashitit vjen shumë vonë. Egnatia shënon edhe golin e katërt me Montenegron, duke vulosur suksesin 4-1 në këtë takim, që i zhyt verilindorët edhe më thellë në krizë.
Teuta-Tirana, një barazim “i çmendur”. Mbyllet 2-2, kryeqytetasit shpërdorojnë, por durrsakët luftojnë për një pikë. Tirana ka shpërdoruar një epërsi prej dy golash të premten në mbrëmje, teksa sfida ndaj Teutës në “Niko Dovana” është mbyllur në barazim 2-2, me të dyja skuadrat që detyrohen të kënaqen me nga një pikë në atë që ishte një ndeshje e luftuar nga fillimi deri në fund, teksa kryeqytasit e kanë mbyllur ndeshjen me 10 lojtarë, pas ndëshkimit me karton të kuq të Dokës.
