ASNN – Sulmuesi, por edhe mbrojtësi Fidan Aliti, flasin para dy sfidave të Eliminatoreve të Botërorit. Koha për të shndërruar lojën e mirë dhe rastet e ndërtuara për shënim në gola dhe rezultate. Kështu e ka cilësuar sulmuesi i përfaqësueses së Kosovës, Milot Rashica, sfidën e ardhshme me Suedinë. “Në këtë grumbullim kemi pasur më shumë ditë në dispozicion së bashku dhe besoj që kemi pasur kohë të mjaftueshme të përgatitemi”, – tha Rashica.
“Duke pasur parasysh lojën e mirë kundër Spanjës, ku përveç rezultatit negativ, kemi krijuar shumë raste, shpresoj se në këtë ndeshje do të arrijmë t’i përfundojmë në mënyrën më të mirë rastet që na jepen dhe do t’i gëzojmë tifozët tanë”, – ka shtuar ai. Të njëjtin mendim ndan edhe mbrojtësi Fidan Aliti. Kësaj radhe kemi pasur kohë të mjaftueshme për t’u përgatitur për këtë ndeshje të rëndësishme për neve dhe besoj se secili prej neve është 100 përqind i gatshëm për lojë”, – deklaroi ai.
Kosova është stërvitur të enjten në kushte të vështira të motit, por kjo për të dy futbollistët ishte përgatitja më e mirë për një sfidë si ajo në Suedi. “Sot ka qenë një stërvitje më e lehtë, duke pasur parasysh se dje ka qenë intensiteti shumë më i madh, – ka pohuar Rashica. – Gjatë gjithë javës kemi stërvitur në mënyrën më të mirë të mundshme dhe sigurisht se do të shkojmë për rezultat pozitiv.” Ndërkaq, edhe mbrojtësi i Kosovës, Aliti, e cilësoi si të dobishme këtë stërvitje.
“Moti ishte pak i vështirë, por ne si futbollistë jemi mësuar të stërvisim edhe në këso kushte, – ka theksuar ai. – Madje, mendoj se kjo ka qenë një përgatitje e mirë për Suedi, ngase edhe atje na pret një mot i tillë.” Përfaqësuesja e Kosovës niset të premten në mëngjes drejt Suedisë, ku edhe do ta zhvillojë stërvitjen e fundit në stadiumin “Friends Arena” në Solna të Stokholmit, duke nisur nga ora 18:00, në të njëjtën fushë dhe orar në të cilin do të luhet edhe ndeshja e së shtunës.
