ASNN – Dy ndeshjet e së hënës në futboll luhen pa tifozë, basketbolli e volejbolli pezullojnë veprimtaritë. Koronavirusi “i ka mbyllur dyert” edhe sportit shqiptar. Kështu, dy ndeshjet e së hënës në futboll, të vlefshme për javën e 26-të të Kategorisë Superiore, do të luhen pa tifozë, ndërsa edhe basketbolli dhe volejbolli i pezullojnë veprimtaritë e tyre sportive duke respektuar vendimin e qeverisë. Pezullimi i të gjitha veprimtarive sportive deri në datën 3 prill 2020, i marrë nga qeveria, ka bërë që edhe federatat sportive të reflektojnë.
Kështu, sipas një njoftimi për shtyp, mësohet se Komiteti i Emergjencës në Federatën Shqiptare të Futbollit është mbledhur ditën e hënë për të vlerësuar situatën pas të urdhërit nr. 132, datë 8/3/2020 të Ministrisë së Shëndetësisë dhe Mbrojtjes Sociale lidhur me pezullimin e aktiviteteve sportive dhe sociale në vend. “Komiteti i Emergjencës vlerësoi se duke qenë se 4 ekipet janë grumbulluar tashmë, përkatësisht në Shkodër (Vllaznia-Partizani) dhe Korçë (Skënderbeu-Kukësi), të vijojë me zhvillimin e këtyre dy ndeshjeve të javës së 26-të të Kategorisë Superiore, me dyer të mbyllura”, – thuhet në njoftimin e organizmit që qeveris futbollin në vend.
Njoftim që, më tej, vijon: “Komiteti i Emergjencës në FSHF, i kërkon Këshillit të Ministrave një takim për të diskutuar në detaje lidhur me vijimësinë e veprimtarive futbollistike në vend.” Ndërkohë, Sekretari i Përgjithshëm i Federatës Shqiptare të Basketbollit, Korab Llazani, ka konfirmuar për Rrjetin e Radio-Televizionit Shqiptar se, në përputhje me vendimin e marrë nga qeveria, të gjitha veprimtaritë e koshit shqiptar do të pezullohen deri në një njoftim të dytë.
Edhe Federata Shqiptare e Volejbollit ka njoftuar se do të respektojë vendimin e qeverisë dhe të ndërpresë të gjitha veprimtaritë sportive. Burime nga Komiteti Olimpik Kombëtar Shqiptar, (KOKSH), kanë pohuar për Rrjetin e Radio-Televizionit Shqiptar se po u bëhet thirrje të gjitha federatave sportive në vend që të marrin masa për të pezulluar të gjitha veprimtaritë e tyre deri në një vendim të dytë që do të merret nga qeveria shqiptare në varësi të rrethanave.
