ASNN – Pas 10-ditëve stërvitje në Pezë-Helmës, dibranët shtegtojnë matanë kufirit për një javë. Pas 10 ditëve stërvitje të zhvilluar në Kompleksin e Pezë-Helmësit, Korabi e ka vijuar mini-fazën përgatitore dimërore në qytetin e Ohrit në Maqedoni prej dy ditësh, i kushtëzuar edhe nga kushtet klimaterike në Peshkopi. Ekipi dibran, i drejtuar nga trajneri kavajas, Dorian Bubeqi, do të qëndrojë për një javë në vendin fqinj.
Për t’i vijuar më pas në shtëpi përgatitjet për ndeshjen e parë të 2020-ës, që duhej të ishte përballja e 25 janarit me Shkumbinin. Por skuadra peqinase është përjashtuar nga kampionati i këtij sezoni, duke bërë që Korabi ta bëjë pushin javën e 13 të grupit A të Kategorisë së Parë. Në fakt, dibranët e mbyllën 2019-ën duke ndarë vendin e dytë dhe të 3-të me Besëlidhjen e Lezhës, me nga 19 pikë, 7 pikë prapa Kastriotit kryesues.
Pak ditë para mbylljes së vitit të shkuar, Korabi ka arritur marrëveshje me Armend Murrjen, duke rinovuar në prag të skadencës së kontratës aktuale. Dibrani ka firmosur edhe për 2 vitet e ardhshme me Korabin, me të drejtë rinovimi. Murrja është produkt i akademisë së futbollit të Korabit dhe i ka qëndruar besnik skuadrës së tij të vendlindjes.
Ndërsa pak ditë më parë, është mësuar se Briken Doçi vendos të largohet nga Shqipëria duke mbyllur kështu kontratën para kohe me Korabin. Në kuadër të përgatitjeve për gjysmën e dytë të sezonit, Korabi ka zhvilluar një ndeshje miqësore me Elbasanin, që ka përfunduar pa gola, 0-0. Ishte një miqësore që u shërbeu trajnerëve për të mbajtur lojtarët në tonus.
