ASNN – Evropiani i futbollit është edhe një turne i larmishëm shifrash dhe midis tyre spikat edhe Kombëtarja kuqezi. Në gjirin e saj është njëri prej 3 lojtarëve më të moshuar, ndërsa kuqezinjtë janë një ndër 6 përfaqësueset më shtatshkurtëra të këtij Evropiani, ashtu sikundër është një nga përfaqësueset më të lehta në peshë.
Futbolli është një lojë për të rinj, por kështu nuk mendojnë disa futbollistë, përfshirë edhe portierin e dytë të kombëtares shqiptare, Orges Shehi, i cili është lojtari i tretë më i moshuar në Evropian.
Në të vërtetë, numri 1 i Skënderbeut këtë pozicion duhet ta ndajë me tre të tjerë, përfshirë portierin e Italisë, Xhanluixhi Bufon, si dhe mbrojtësin e Portugalisë, Rikardo Karvajo.
Por, kush është lojtari më i vjetër që do të jetë në Evropian? Për vendin e parë do të ketë dy lojtarë, ose më saktë, dy portierë, Shej Givën i Irlandës dhe Gabor Kirali i Hungarisë. Ndërkohë, Kombëtarja kuqezi spikat edhe për statistika të tjera.
Ndonëse mesatarja e gjatësisë si skuadër është e admirueshme, me 1 metër e 82 centimetra, Shqipëria është një ndër 6 përfaqësueset më shtatshkurtëra të këtij Evropiani.
Në “çatinë” e tij qëndron Suedia, me 1 metër e 86 e më pas vijnë Austria, Belgjika, Kroacia, Gjermania, Hungaria, Islanda e kështu me radhë, kurse përfaqësuesja më shtatshkurtër është Spanja, me 1 metër e 80 centimetra.
Po kështu, Kombëtarja kuqezi është një nga përfaqësueset më të lehta të këtij Evropiani, me një peshë mesatare prej 75.65 kilogramësh. Më e rënda? Gjermania, me plot 80.30 kg.
