ASNN – Në prag të sfidës me Anglinë, kanë dalë të mërkurën në një konferencë për mediat Sokol Cikalleshi dhe Odise Roshi, të cilët kanë folur në lidhje me dy përballjet e 10-ditëshit të dytë të nëntorit. Kombëtarja shqiptare po bëhet gati për të zhvilluar dy ndeshjet e fundit në kuadër të Eliminatoreve të Botërorit 2022, ndaj Anglisë dhe Andorrës. Fillimisht kuqezinjtë do të luajnë ndeshjen e parë në stadiumin e “Uemblit” ndaj anglezëve më 12 nëntor 2021, ndërsa 3 ditë më vonë, skuadra e trajnerit Edoardo Reja do të luajë në Stadiumin “Arena Kombëtare” me Andorrën.
Dhe futbollisti kuqezi, Odise Roshi u shpreh përpara gazetarëve se skuadra do të japë maksimumin në ndeshjen ndaj Anglisë në Uembli, teksa theksoi se shpreson që të zërë një vend titullari në formacionin ndaj anglezëve. Ai gjithashtu theksoi se ekipi kuqezi është rritur si dhe i vendosi edhe një notë Kombëtares për ndeshjet e këtij edicioni kualifikuesesh. “Të gjithë e dimë që me Anglinë është një ndeshje shumë e vështirë, – ka thënë ai fillimisht. – Të gjithë e dinim cilësinë që Anglia ka shfaqur dhe ka. Kurse puna e trajnerit, se si do të luajë në fushë, atë po e bëjmë në stërvitje.”
“Ende nuk e ka vendosur me çfarë taktike do të luajmë, – ka vijuar 30-vjeçari. – Po shpresojmë të bëjë atë që ka bërë gjithmonë dhe kur të futemi të japim më të mirën dhe tani, nëse themi do të fitojmë, këtë kemi thënë gjithmonë. Do të shkojmë në Uembli të luajmë dhe të japim maksimumin. Mesfushën e kemi shumë të mirë. Jemi mirë dhe jemi rritur shumë si ekip.” Po a pret ai të jetë titullar ndaj Anglisë? “Trajneri nuk e ka vendosur ende se cilët do të jenë 11 lojtarët që do të zbresin në fushë”, – përgjigjet Roshi.
“Është kënaqësi shumë e madhe të luash kundër një ekipi shumë të madh cilësor siç është Anglia, por shpresoj që të luaj në formacion”, – ka shtuar fieraku, i cili është pyetur edhe se çfarë note do t’i vinte kësaj Kombëtareje kuqezi. “Nota 10 është më e mira, por besoj se notën 8. Çdo lojtar që vjen në Kombëtare do të japë maksimumin dhe do të luajë në formacion, por gjithmonë e kam thënë, çdo herë që futem, që nga minuta e parë te minuta e fundit, apo edhe pesë minutat e fundit, unë gjithmonë jap më të mirën.
Hëpërhë, një vend në Botëror apo në “play-off” është bërë një çështje matematikore, por Roshi nuk ka hequr ende dorë nga të besuarit te kualifikimi. “Mrekullitë kanë ndodhur dhe prandaj janë të bukura, – ka thënë ai. – Shpresoj që të ndodhë kjo gjë. Kështu kemi shkuar edhe në Portugali në 2014 dhe e kemi fituar ndeshjet. Tani lojtarët janë në formë, si Cikalleshi që ka qenë edhe lojtari i javës në formacion në Turqi. Ashtu ka edhe lojtarë të tjerë, si Bare, Kumbulla, Ismajli, që luajnë në nivele shumë të mira. Shpresojmë.”
