ASNN – Trajneri i Kombëtares, Edoardo Reja, ka zbuluar edhe synimet e tij për dy përballjet e fundmarsit. “Unë në fakt Federatës i kisha kërkuar dy miqësore të rëndësishme ku mund të bëjmë vlerësime, – ka thënë ai gjatë konferencës për shtyp të së premtes në Barcelonë. – Këto janë teste për të parë këtë rritje. Djemtë janë të bindur për cilësitë e tyre, po punojnë mirë dhe janë një grup i bukur. Nuk do ta tërheqin këmbën mbrapa sepse duan të bëjnë mirë. Janë ndeshje këto si me Spanjën ku edhe mua do të më pëlqente të luaja ndeshje të këtij niveli.”
“Mendoj se djemtë janë entuziastë përpara këtyre ndeshjeve ku duan të tregojnë cilësitë dhe uroj që të bëjmë një ndeshje të mirë, – ka vijuar veterani italian. – Ne fizikisht duhet të jemi në maksimum sepse për të konkuruar Spanjën teknike duhet të vraposh dhe ne në grupin tonë kemi lojtarë që kanë këto cilësi dhe e kanë treguar. Kanë rezistencë të madhe dhe një karakter të shkëlqyer. Nuk jemi një skuadër që dorëzohet lehtë. Kemi një grup lojtarësht që në këtë drejtim ka dhënë gjithmonë maksimumin.”
“Ne duam t’ja lëmë Spanjës topin gjithmonë, mjafton që ti lejojmë pak mundësi shënimi, – ka sqaruar kreu i stolit kuqezi. – Ka pak rëndësi mbajtja e topit, varet nga paraqitja dhe nga rezultati sepse gjithësecili ka filozofinë e tij të lojës. Të Spanjës e dimë dhe ҫdo skuadër ndaj Spanjës është në vështirësi në këtë drejtim. Ne sigurisht që do të kemi vështirësi në disa momente por ne i kemi armët, shpejtësinë në fazën sulmuese dhe në krah, cilësi për t’i surprizuar. Ky është qëllimi jonë. Në mesfushë nuk duhet të lejojmë hapësira.”
“Duhet të luajmë si skuadër dhe nuk duhet të mendojmë për paraqitje individuale, sepse është e qartë që, kush do të tentojë nesër t’i zgjidhë momentet vetëm, do të gabojë. sepse kjo nuk është ndeshje për të bërë këtë. Duhet të luajmë si skuadër. Duhet të jemi shumë kompakt, shumë të mbyllur dhe të mos u japim hapësirë atyre për të pasur pasime filtruese. Nëse i lejojmë hapësira, me cilësitë që kanë, mund të na vendosin në vështirësi të mëdha. Duhet të jemi shumë të kujdeshëm dhe të përqendruar për 90 minuta”, – ka përfunduar trajneri i Kombëtares, Edoardo Reja.
