ASNN – Ai do të presë deri në fund për të vendosur për formacionin e tij në miqësoren e së shtunës me Spanjën. “Nuk di kush do të luajë, – ka pohuar trajneri i Shqipërisë së futbollit, Edoardo Reja, gjatë konferencës për shtyp të së premtes në Barcelonë. – Nesër në mëngjes do të bëj stërvitjen e fundit dhe do të vendos. Por ndërkohë më kanë dhënë përshtypjen që janë të gjithë në formë e kush do të zbresë në fushën e lojës do të jetë mirë fizikisht sepse e kam dalluar këtë gjë në këto 4 ditë që jemi bashkë.
“Nëse shikoni lojtarët tanë, luajnë të gjithë, – ka vijuar ai. – Kemi 5 sulmues dhe kanë luajtur të gjithë dhe kanë të gjithë gjendjen e mirë për të luajtur ashtu si edhe mesfushorët. Lojtarët tanë luajnë dhe aktivizohen në klubet e tyre. Jam i sigurt që kë do të zgjedh do të më japë një paraqitje të mirë. Nuk është se nuk dua ta zbuloj formacionin por nuk më duket korrekte sepse më përpara duhet të flas me lojtarët pa folur me ta. Kush do të zbresë në fushën e lojës do më japë maksimumin. Unë bëj gjithmonë diskutimin në nivel kolektiv dhe asnjëherë aspektin individual.”
“Nuk duhet të fokusohemi ke aspekti individual, – ka theksuar 76-vjeçari më tej në analizën e tij. – Unë dua të luajmë me skuadra të rëndësishme, të forta, me cilësi për të parë sase jemi rritur. Do të më pëlqente të luanim ndaj Maqedonisë së Veriut për të parë sesa konkurrues jemi ne përballë tyre, që të na ndihmojë për t’u rritur. Grupi i të rinjve? Kemi marrë këtë herë element të rinj. Asllani, për shembull, luan titullar me Empolin dhe titullar. Kemi një lojtar të 2002 si Bajrami që pavarsisht se luan me të rinjtë ka cilësi shumë të mira.
“Dhe nëse do të kem mundësi do ta aktivizoj. Ivan Balliu ka qënë më parë me Panuçin, tani po bën shumë mirë te skuadra e tij. Duke luajtur në Spanjë duhet të luajë këtë ndeshje. Të tjerët kanë luajtur dhe këto janë të rinjtë që dua të shoh në lojë”, – përfundoi prononcimin e tij për mediat trajneri i Kombëtares kuqezi, Edoardo Reja.
