ASNN – Në ditën e dytë të grumbullimit Kombëtarja shqiptare ka zhvilluar seancën stërvitore të radhës në kuadër të dy miqësoreve me Spanjën dhe Gjeorgjinë. Në drejtimin e trajnerit Edoardo Reja dhe stafit teknik, futbollistët kuqezi kanë zbarkuar këtë të martë në qendrën stërvitore “Rojalverd Vall de Bas” për seancën e parë me ngarkesë të plotë.

Ka munguar edhe sot mesfushori Amir Abrashi, i cili është ende në pritje të përgjigjeve të analizave mjekësore pas një dëmtimi muskular gjatë ndeshjes së kampionatit zviceran me klubin të dielën e kaluar. Të gjithë lojtarët e tjerë janë stërvitur normalisht me grupin që në pjesën e parë ka bërë ushtrime fizike e më pas fokusi ka qenë në pjesën taktike të lojës.

Sipas burimeve në kampin kuqezi, impenjimi nga ana e të gjithë futbollistëve ka qenë maksimal, ndërsa për momentin nuk ka asnjë lojtar me probleme fizike dhe çdo gjë po shkon sipas programit. Shqipëria përballet me Spanjën në Stadiumin “RCDE” të Espanjolit më 26 mars, në miqësoren që do të sillet për sportdashësit drejtpërdrejt nga Rrjeti i Radio-Televizionit Shqiptar.