ASNN – Përkundër asaj që është folur gjatë këtyre 24 orëve të fundit, trajneri Xhovani de Biazi nuk ka ndërmend të largohet nga drejtimi i Kombëtares kuqezi. Një gjë të tillë ai e ka përsëritur sot në Durrës, duke sqaruar se nuk shikonte ndonje arsye pse duhet ta bënte një gjë të tillë. Sa i përket objektivit të vendit të tretë, De Biazi foli pa doreza. Kështu, trajneri i Kombëtares, Xhovani De Biazi, ka rikonfirmuar në një konferencë për shtyp të mbajtur sot në Durrës se ai nuk po mendonte të largohej nga Kombëtarja shqiptare, por kishte mbetur i zhgënjyer nga sjellja e tifozëve.
“Jam pak në moshë dhe nuk marr kurrë vendime të nxituara, – ka deklaruar ai. – Reflektoj dhe mendoj. Meqë nuk ka arsye, nuk shoh pse. Mua do të më pëlqente të kuptoja atë se pse pas asaj gjëje të bukur që bëmë të gjithë bashkë, lojtarë, tifozë, në Europian, në të gjithë rrugën, nuk e di pse mbrëmë ndodhi kjo. Sidomos kur unë një ditë më parë thashë se tifozët tanë janë speciale, do i këndojnë dy himnet. U ndjeva shumë keq, mbrëmë përveç rezultatit pata si ndjesi të keqe edhe këtë që nuk e prisja, ishte një plagë e thellë.”
“Se e di që shpirti i tifozëve, sidomos atyre kuqezi, është të jenë gjithmonë me skuadrën dhe jo të bëjnë atë gjë, – ka shtuar italiani me pasaportë shqiptare. – Tani duhet që çdokush të mbajë përgjegjësitë e tij për fajet”. Ndërkaq, duke folur për çështjen “Xhaka”, trajneri bëri të ditur se nuk kishte asnjë përplasje me të apo ultimatum për mospraninë në Kombëtare por saktësoi që Xhaka duhej të tregonte në fushë se meritonte të luante. “Mund të bëjmë edhe pa të”, – tha ai. Sa i përket objektivit të vendit të tretë, De Biazi foli pa doreza.
“Objektivi ynë është t’i mbyllim sa më mirë këto Eliminatore, – tha ai. – Kemi përpara dy skuadra përbindësh si Spanja dhe Italia që kanë treguar në fushë se janë më të aftë se ne. Ne duhet të mundohemi të luajmë 5 ndeshjet e fundit ashtu siç dimë”. Trajneri i Kombëtares është pyetur nëse miqësorja me Bosnjë-Hercegovinën do të shërbejë për të konsoliduar formacionin apo për të provuar të rinj. “Të shohim, të bëjmë një herë kontrollin e lojtarëve, si janë, si rikuperojnë pas ndeshjes, – theksoi 60-vjeçari. – Pastaj do të hedhim në fushë skuadrën më të mirë për të bërë rezultat.”
“Pastaj të shohim nëse gjate ndeshjes mund të hedhim në fushë ndonjë djalosh për ta provuar e testuar. Për të kuptuar programet e të ardhmes të kombëtares”, – ka përfunduar trajneri i Shqipërisë, Xhovani De Biazi.
