ASNN – Pas ndeshjes miqësore me Katarin të fituar 3-1 nga kombëtarja shqiptare, trajneri Xhovani De Biazi, presidenti I FSHF, Armand Duka dhe gjithë futbollistët kanë bërë një vizitë në muzeun e Vjenës, ku ndodhen armët e heroit tonë kombëtar, Gjergj Kastrioti. Arlind Ajeti dhe Ansi Agolli, dy nga lojtarët e ekipit tonë përfaqësues, mendojnë se harmonia që ekziston në grup është një faktor pozitiv që do të ndikojë në ndeshje.
Të gjithë futbollistët që kanë dalë në konferencë për shtyp nga qendra stërvitore në Austri, shprehen se do të bëjnë gjithçka për të kaluar grupin në Evropianin Francë 2016. Ky besim i madh për një kualifikim të mëtejshëm përcillet nga Austria edhe në konferencën për shtyp, ku ka folur Agolli. “Ekipi ka nevojë për sa më shumë harmoni, – ka thënë ai. – Kemi entuziazëm që na ndihmon të jemi pranë njëri tjetrit. Mendoj se ka larmi moshe dhe karakteresh në skuadër.”
“Mundohesh të përshtatesh në mënyrë që të ecim sa më mirë bashkë dhe ia kemi arritur, – ka theksuar mbrojtësi. – Ne jemi një grup prej 30 lojtarësh që kemi afrimitet të madh. Mendoj se të gjithëve na vjen keq për ata që do të largohen dhe do të jetë emocionuese. Të gjithë do të ndjejnë keqardhje. Nëse bëjmë të njëjtën lojë si në Eliminatoret e Evropianit, atëherë kemi mundësi të mëdha të kalojmë grupin, sepse skuadrat që kemi përballë nuk kanë ndryshime me ato që kishim në Eliminatore.”
Si çdo shqiptar, edhe Agolli ka skuadrën e tij të preferuar në një eveniment të tillë, por tashmë gjërat kanë ndryshuar. “Deri para dy vitesh kam qenë me Gjermaninë, – ka zbuluar ai. – Nuk e fsheh që për një lojtar që ka luajtur kaq vite të jetë i lumtur që jam pjesë e këtij grupi.”
