ASNN – Në atë që ishte një risi për vetë Komitetin Olimpik Kombëtar Shqiptar, por edhe për sportet e tjera në përgjithësi, të mërkurën është zhvilluar nëpërmjet platformave të komunikimin në Internet, mbledhja e Komisionit Teknik pranë këtij organizmi. I kryesuar nga presidenti i Federatës Shqiptare të Volejbollit, Erlind Pëllumbi, që është edhe Kryetar i tij, Komisioni ka diskutuar mbi 6 pikat e rendit të ditës.
Ato ishin situata aktuale e sportistëve në lidhje me koronavirusin, vlerësimi i ecurisë së bursave olimpike, diskutimi mbi programin e KOKSH-it tek Talenteve të Reja, diskutimi mbi zgjerimin e mbështetjes së sportistëve me bursa, diskutimi mbi udhëzimin e përbashkët të ministrive dhe kriteret e kategorizimit, si çështje të ndryshme.
Duke qenë se Lojërat Olimpike të këtij viti u shtynë për në 2021-shin, për fat të mirë, Komiteti Olimpik Ndërkombëtar (IOC) ka vendosur që programi i bursave për “Tokio 2020” do të vazhdojë edhe për një vit, duke u mundësuar sportistëve mbështetje për përgatitjen e tyre.
Mbajtësit e bursës olimpike të “Tokio 2020” janë Luiza Gega dhe Izmir Smajlaj në atletikë, Indrit Çullhaj në xhudo, Nikol Merizaj, në not, Xhino Toli në karate, Eriglent Prizreni në mundje dhe Elord Gjana në taekuondo. Njëkohësisht me sportistët që mbajnë bursat Olimpike, KOKSH ka mbështetur edhe disa sportistë të tjerë që kanë synuar kualifikimin për në “Tokio 2020”.
Ata janë Briken Calja dhe Erkand Qerimaj në peshëngritje, Franko Burraj në atletikë, Bekim Basha në karate, Juirdo Cani në taekuondo dhe Elsidita Selaj në boks. Në vijimësi KOKSH ka realizuar programe në mbështetje të sportistëve të rinj të talentuar në kuadër të krijimit të premisave të një brezi të ri që në të ardhmen të jenë sportistët e elitës për të marrë pjesë në Lojërat Olimpike.
Ky është një program identifikimi, motivimi dhe inkurajimi për sportistët e rinj që të gjejnë një mbështetje dhe talenti i tyre të vlerësohet ndryshe nga sportistët e tjerë. Sa i përket diskutimit mbi udhëzimin e perbashkët të ministrive dhe kriteret e kategorizimit, u propozua që ky të jetë një diskutim më i gjerë nga ku do të merren opinionet nga Federatat Sportive dhe do të adresohen çështjet drejt MASR.
