ASNN – Teuta, “macja e zezë” e rrogozhinasve. Durrsakët nuk e njohin humbjen në 7 ndeshjet e fundit përballë Egnatias. Janë luajtur të dielën 3 ndeshjet e para të javës së 25-të të Kategorisë Superiore dhe, në ndeshjen e zhvilluar në Rrogozhinë, Egnatia kryesuese nuk ka shkuar dot më larg se një barazim pa gola në fushën e vet përballë Teutës së vendit të parafundit, që sidoqoftë merr një pikë me vlerë në atë që ishte ndeshja e 3-të radhazi pa humbje dhe, për më tepër, pa pësuar një gol.

Por, më tepër sesa kaq, skuadra durrsake mund të quhet me plot gojën “macja e zezë” e rrogozhinasve, teksa në 7 përballjet e këtyre dy sezoneve të fundit, Teuta nuk e njeh humbjen përballë Egnatias. Në fakt, ndeshja e zhvilluar pasdreke i ka patur të gjitha, dy gola të anuluar, por edhe dy shtylla për vendasit, një shtyllë dhe disa raste të mira të miqve, por, deri në fund të kohës së rregullt dhe minutat shtesë nuk pati gola dhe Egnatia dhe Teuta ndahen me rrjeta të paprekura, duke ndarë edhe nga një pikë, që i lë sidoqoftë skuadrat në pozita të pandryshuara. Rrogozhinasit mbeten në krye, tashmë në kuotën e 49 pikëve, ndërsa durrsakët të parafundit, por në kuotën e 25 pikëve, një më pak sesa Erzeni i vendit të 8-të, që fitoi me përmbysje 2-1 në Kukës ndaj skuadrës vendase.