ASNN – “Visit Malta Trophy”, Shqipëria luan ndeshjen e parë në Maltë ndaj Bjellorusisë. Kështu, Shqipëria e futbollit të femrave zhvilloi ndeshjen e parë në turneun “Visit Malta Trophy”. Vajzat kuqezi u mposhtën nga Bjellorusia në stadiumin “Toni Becina” me rezultatin 0-3.
Trajneri Armir Grima e nisi me këtë formacion titullar sfidën ndaj Bjellorusisë: Viona Rexhepi në portë, Luçije Gjini, Sara Maliqi, Alma Hilaj, Armera Tukaj, Ezmiralda Franja (kapitene), Djellza Istrefaj, Gresa Berisha, Valentina Troka, Mikaela Metalla dhe Fortesa Berisha.
Ndeshja nisi më mirë për Shqipërinë që i shkoi shumë pranë golit që në minutën e 5-të. Vajzat kuqezi rrezikuan dy herë me Djellza Istrefajn dhe Fortesa Berishën por pa sukses. Ndërkohë, në minutat në vijim, Shqipëria pësoi golin e parë në të 35-ën, pas një autogoli.
Pjesa e parë përfundoi 0-1, ndërsa fraksioni i dytë nisi me një zëvëndësim për Kombëtaren. Në fushën e lojës u aktivizua Arbenita Curraj, ndërsa Bjellorusia realizoi edhe golin e dytë në minutën e 62-të me Ana Pilipenkon. Katër minuta përpara përfundimit të kohës së rregullt, Bjellorusia shënoi edhe një tjetër gol me të njëjtën autore, Pilipenkon.
Kështu sfida përfundoi me fitoren e Bjellorusisë me rezultatin 3-0. Kombëtarja shqiptare e futbollit të femra do të luajë ndeshjen e dytë në turneun “Visit Malta Trophy” ndaj Ishujve Faroe, më 25 shkurt 2024. Edhe ky takim do të zhvillohet në Stadiumin “Toni Becina”, duke nisur nga ora 14:00.
https://www.youtube.com/live/15bY7JGL2h4?si=mnVpsvLzQdsSei9h
