ASNN – Ashtu sikundër ishte njoftuar, në mjediset e Federatës Shqiptare të Futbollit ka nisur në ora 11:00 takimi me drejtuesit e klubeve të Kategorisë Superiore. Një ditë më parë, FSHF-ja kishte dërguar një përfaqësi në Ministrinë e Shëndetësisë dhe Mbrojtjes Sociale. Projekt protokolli sanitar për zhvillimin e ndeshjeve ka qenë në qendër të vëmendjes dhe ka një dakordësi për të.

Mbeteshin të zbulohen detajet dhe për këtë qëllim organizmi që qeveris futbollin në vend po zhvillon një mbledhje me të gjithë Presidentët e Kategorisë Superiore për të diskutuar mbi të gjitha mundësitë e rifillimit të futbollit. Në tryezën e hapur, të drejtuar nga Presidenti i Federatës Shqiptare të Futbollit, Armand Duka dhe që po mbahet në mjediset e reja të FSHF-së në kryeqytet, u diskutua rreth rikthimit të futbollit në fushat e blerta.

Presidentët dhe përfaqësuesit u njohën gjithashtu edhe me protokollin sanitar që do te aplikohet nga të gjitha klubet, që prej javës tjetër, kur sipas të gjitha gjasave do të rinisin edhe stërvitjet individuale. Kështu, Superiorja rikthehet në fillim të muajit qershor, më datë 3. FSHF njoftoi një ditë më parë për takimin me klubet, pasi më parë ishte biseduar me Ministrinë e Shëndetësisë për Protokollin Sanitar.

Pas takimit, për mediat folën edhe përfaqësuesit e klubeve, kryesisht presidentë. Gjithashtu bëhet me dije se Kupa nuk do të preket, pasi koha është e mjaftueshme që gara të mbyllet dhe kjo veprimtari të zhvillohet e plotë, me sistem vajtje-ardhje. Finalja e Kupës zhvillohet me 2 gusht 202. Për të mos pasur shumë ngjeshje në kalendar, është vendosur që kampionati të përfundojë më 28-29 korrik 2020.

Kështu, organizmi që qeveris futbollin në vend duhet të dorëzojë në UEFA kalendarin për përmbylljen e kampionateve para 20 majit, sikurse edhe i është kërkuar. Pak orë pas mbylljes së takimit, FSHF-ja ka publikuar edhe kalendarin e plotë, i cili është si vijon:

KALENDARI I SUPERIORES:

Java e 27-të, 3 qershor 2020

Java e 28-të, 7 qershor 2020

Java e 29-të, 14 qershor 2020

Java e 30-të, 21 qershor 2020

Java e 31-të, 28 qershor 2020

Java e 32-të, 4 korrik 2020

Java e 33-të, 12 korrik 2020

Java e 34-t, 18 korrik 2020

Java e 35-të, 25 korrik 2020

Java e 36-të, 29 korrik 2020

NDESHJET E KUPËS SË SHQIPËRISË:

Çerekfinalet, më 10 dhe 24 qershor 2020

Gjysmëfinalet, më 1 dhe 15 korrik 2020

Finalja, më 2 gusht 2020

NDESHJET E PLAY-OFF-IT:

Më 5 dhe 6 gusht 2020