ASNN – Drejtori i skuadrës gjermane flet për zgjatjen e bashkëpunimit me pilotin britanik. Kontrata aktuale e 6 herë kampionit të botës, Ljuis Hemilton, me “Mercedes”-in skadon në fund të këtij viti. Por kreu i skuadrës gjermane, Toto Volf, thotë se pret që bisedimet për rinovimin e kontratës të nisin në javët e ardhshme. E ardhmja e Ljuis Hemiltonit ka qenë në qendër të spekulimeve të vazhdueshme gjatë muajve të fundit, teksa kontrata aktuale e 6 herë kampionit të botës me “Mercedes”-in skadon në fund të këtij viti.
Por kreu i skuadrës gjermane, Toto Volf, thotë se pret që bisedimet për rinovimin e kontratës të nisin në javët e ardhshme. Në fakt, është shndërruar në një traditë tanimë për Hemiltonin dhe “Mercedes”-in që të presin mbylljen e ndërprerjes dimërore para se të nisin diskutimet për zgjatjen e kontratës, ndaj edhe fakti që këto bisedime nuk kanë nisur, nuk përbën ndonjë risi. Por nënshkrimi i kontratave të reja nga ana e Maks Verstapenit e Sharl Lëklërkut përkatësisht me “Red Bull”-in dhe “Ferrari”-n, ka bërë që të rritet interesi për të ardhmen e britanikut që synon të thyejë rekordin e Shumakerit.
Sidoqoftë, duke folur në Londër, Toto Volfi la të nënkuptohej se është zgjatja e bashkëpunimit është një përfundim i logjikshëm për të dyja palët. “Është një çift që vetëm se mund të shkojë përpara krah më krah”, është shprehur figurativisht kreu i skuadrës gjermane, duke shtuar: “Ne duam të kemi pilotin më të shpejtë në makinën tonë dhe unë e di që Ljuisi dëshiron të jetë në makinën më të shpejtë dhe prandaj kjo është zgjedhja më e mirë e mundshme për të dyja palët.”
“Ne udhëtojmë rreth e rrotull botës për 10 muaj çdo vit dhe i shkatërrojmë nervat njër-tjetrit çdo dy javë dhe ajo që bëjmë gjatë ndërprerjes dimërore, është që e lëmë njëri-tjetrin të qetë. Por unë kam një besim të madh në aftësinë e skuadrës për të tërhequr pilotët më të mirë dhe, për momentin, Ljuisi ka dëshmuar se është piloti më i mirë dhe se bashkëpunimi midis tij dhe nesh është afatgjatë”, – ka përfunduar kreu i skuadrës gjermane të “Mercedes”-it, Toto Volf.
