ASNN – Është bërë tashmë traditë që një kafshë të përzgjidhet si orakulli i një Kampionati Botëror dhe më i famshmi prej tyre ishte oktapodi Pol. Por, në “Rusi 2018”, gjithçka do t’i besohet intuitës së një maçoku të quajtur Akil dhe, që, për më tepër, është edhe i shurdhër. Kështu, Rusia ka bërë të ditur të hënën pasdite se do të jetë një mace e bardhë dhe e shurdhër, që jeton në Muzeun historik “Hermitejxh” të Shën Pjetërburgut, parashikuesja zyrtare e Botërorit të këtij viti.
Maçoku i quajtur Akil do të shpresojë të përsërisë “veprat” e Oktapodit Pol dhe kafshëve të tjera parashikuese, të cilëve u është besuar detyra e gjetjes së fituesve të veprimtarisë më të madhe futbollistike në botë. “Ne do të mbajmë një konferencë të posaçme për shtyp dhe do t’i dorëzojmë edhe një kartë zyrtare tifozi”, – deklaroi për mediat ruse zyrtarja e shtypit pranë këtij Muzeumi Meri Khaltunen. Vetë fakti që koleksioni më i famshëm i artit në Rusi ka një zëdhënëse për macet mund të jetë një lajm më vete.
Por mediat vendase raportojnë se macet e Muzeumit “Hermitejxh” janë një legjion më vete dhe, mesa duket, jannë edhe ekspertë futbolli. Macet u sollën fillimisht në këtë Muze nga Pjetri i Madh, i cili e bëri Pallatin Dimëror shtëpinë e tij të re perandorake në shekullin e 17-të. Themeluesja e Muzeut të Maceve brenda “Hermitejxhit”, Ana Kondratjeva, tha se Akili bëri një pushim dhe vuri bark pasi gjeti me sukses fituesit e sfidave të Kupës së Konfederatave, që u zhvillua vitin e shkuar në Rusi.
Nuk dihet me saktësi sesa i zoti ishte ai në këtë mision. Por maçoku 4.7-kilogramësh duhet të jetë në formë të shkëlqyer për të përsëritur parashikimet e sakta të Oktapodit Pol në të 7 fitoret e Gjermanisë në Botërorin e 2010-ës. Okptapodi gjeti edhe fituesen e finales, Spanjën, përkundër dëshirës së gjermanëve. Ndërsa procesi i përzgjedhjes së Akilit do të jetë i thjeshtë: ai thjesht do të fusë hundën në tasin e ushqimit të skuadrës fituese.
Maçoku Akil ka lindur i shurdhër, çka shpjegon intuitën e tij të pazakontë. Sikundër çdo veprimtari madhore sportive, edhe Botërori “Rusi 2018” do të sillet i gjithi për sportdashësit drejtpërdrejt nga Rrjeti i Radio-Televizionit Shqiptar.
