ASNN – 75-vjeçari përmbyll me sukses garën sfiduese të “Ironman” dhe kualifikohet për në Botërorin e Hauait. Mosha është thjesht një numër… Dhe kjo thënie ka gjetur zbatim pikërisht tek Robert Batleri, i cili ditët e fundit ka shkruar historinë e sportit shqiptar. Roberti, apo shkurt “Bobi”, siç e thërrasin miqtë e tij, ka konkurruar në garën ndërkombëtare të “Njeriut të Hekurt” (Ironman), duke u kualifikuar edhe Botërorin e kësaj disipline, që do të mbahet në Hauai të Shteteve të Bashkuara të Amerikës.
“Ironman është një disiplinë sfiduese dhe në kategorinë e grupmoshës nga 75 deri në 79 vjeç, ku ka konkurruar Bobi, duhen përshkruar 2.4 mije, apo 3.86 km not, të ndjekura nga 180 km pedalim dhe që përmbyllen me një maratonë të plotë prej 42 km. 75-vjeçari i ka përshkuar këto distanca për një total prej 15 orësh, 37 minutash dhe 43 sekondash. Ai e ka nisur garimin e tij në orën 7:13 të mëngjesit, për ta mbyllur atë rreth orës 22:50 të mbrëmjes.
E veçanta e britanikut është se në këtë garë të zhvilluar në Vishi të Francës, ai ka konkurruar për ngjyrat e Shqipërisë, teksa prej vitesh tashmë gëzon edhe nënshtetësinë shqiptare. Batleri i përshkoi 3.86 km e notit për 1 orë, 43 minuta e 50 sekonda, duke vijuar ta mbyllë pedalimin e 180 km për 8 orë, 11 minuta e 58 sekonda dhe duke e kryer maratonën për 5 orë, 13 minuta e 16 sekonda. Përmbyllja e garës nga ana e tij është pritur me ovacione nga konkurrentët e tjerë, teksa 75-vjeçari ka ofruar edhe spektakël për këtë arritje të tij.
