ASNN – Java e 10-të e Kategorisë së Parë ka ulur siparin e javës së 10-të të saj, që ishte edhe e para e fazës së dytë, me takimin e fundit të grupit B, atë midis Besës dhe Pogradecit. Kjo ndeshje, që u soll sjellë për sportdashësit drejtpërdrejt nga Rrjeti i Radio-Televizionit Shqiptar, u mbyll në barazim 1-1. Besa dhe Pogradeci kanë shënuar nga një gol secila për secilën pjesë loje, duke ndarë pikët në takimin e fundit të javës së 10-të të Kategorisë së Parë, që ishte edhe java e parë e fazës së dytë.
Takimi i zhvilluar në Stadiumin Besa të Kavajës ka parë vendasit të kalojnë shpejt në epërsi, që në minutën e 4-t. Në fakt, goditja e Draçit është ndihmuar sa nga terreni i fushës, aq edhe nga pasiguria e portierit mik, Mali. Pogradeci do të reagojë dhe ka dy raste brenda 10 minutave të para, por pa e gjetur dot rrugën e rrjetës. Përtej një tjetër pasigure në zonë, por pa pasoja, të Malit, liqenorët këmbëngulin dhe e vënë seriozisht në provë portierin vendas, Miraka,.
Por ai tregohet në lartësinë e duhur në minutën e 25-të. Me një gjysmë rasti të vendasve do të mbyllet pjesa e parë, ndprsa ajo e dyta, që është zhvilluar në një terren të renduar nga shiu i vazhdueshëm, ka parë kavajasit t’i afrohen golit të dytë, por Mali reagon mirë në minutën e 60-të. 5 minuta më pas, portieri vendas do të shkaktojë një ndërhyrje të parregullt brenda zonës dhe gjyqtari bën me dorë nga pika e bardhë. Godet Jahaj dhe përshëndet rrjetën.
Gjithçka është rikthyer në barazpeshë por 25 mintuat e mbetura të lojës do të jenë një betejë e vazhdueshme e Besës për të gjetur golin e fitores, por edhe e të dyja skuadrave me fushën gjithnjë e më të përbaltur, që jo rrallëherë është bërë vendimtare në pengimin e aksioneve sulmuese. Besa do të ndërtojë dhe do të shkojë dëm raste për shënim, ndërsa të dyja skuadrat kanë patur edhe nga një pretendim për një 11-metërsh të padhënë.
Kavajasit do të godasin edhe shtyllën horizontale të portës së liqenorëve, por pa e gjetur godit golin dhe gjithçka mbyllet në barazim 1-1, që sidoqoftë e mban Besën në krye të renditjes së grupit B të Kategorisë së Parë.
