ASNN – Një humbje që nuk përjetohej prej kohësh dhe një mbylljee padenjë e një pjesëmarrjeje në veprimtaritë ndërkombëtare, ku Shqipëria e basketbollit të meshkujve synonte të hidhte hapa përpara.
Kjo është me pak fjalë përmbledhja e pjesëmarrjes në grupin B të para-eliminatoreve të Botërorit 2019, ku Shqipëria i ka humbur të 4 ndeshjet e saj, teksa të shtunën ka kapitulluar turpshëm në Tiranë, duke u mundur 37-113, përballë Holandës.
Kështu, Shqipëria e ka mbyllur me turp grupin B të paraeliminatoreve të Botërorit 2019, pasi në takimin me Holandën, që u zhvillua të shtunën në mbrëmje, në Sallën Sportive të Lojërave me Dorë “Feti Borova” në Parkun Olimpik të Tiranës, ka kapitulluar me shifrat e thella 37-113.
Në fakt, kjo ndeshje, që është sjellë për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar, në kanalin RTSH 1 H dhe në kanalin RTSH Sport të platformës dixhitale të transmetuesit publik, ka nisur mirë për kuqezinjtë, që madje e fitojnë 10-minutëshin e parë 16-14.
Por gjysmëora e mbetur e lojës ka qenë për t’u harruar për skuadrën e trajnerit Antonis Konstantinides, pasi kuqezinjtë kanë çaluar në të gjitha aspektet e lojës, përballë një Holande të kujdesshme dhe të disiplinuar në lojën e saj dhe që për asnjë moment nuk doli nga detyrat taktike dhe skemat e saj.
30-8 e ka fituar pjesën e dytë Holanda, duke shkuar në kryesim me shifrat 44-24. Dy pjesët e tjera kanë qenë edhe më të dobëta për Kombëtaren kuqezi, që shënon vetëm 5 pikë në 10-minutëshin e 3-të, përballë 35 pikëve të holandezëve, dhe 8 në të 4-tin dhe të fundit, përballë 34 pikëve të miqve.
Në përfundim firmoset kapitullimi 37-113, një humbje kjo që nuk përjetohej prej shumë vitesh nga Kombëtarja e të rriturve të Shqipërisë. Në përfundim të kësaj faze paraeliminatore, trajneri qipriot i Shqipërisë, Antonis Konstantinides, ka deklaruar largimin e tij nga drejtimi i Kombëtares kuqezi.
