ASNN – E vetmja skuadër shqiptare e basketbollit që merr pjesë në Kupën e Evropës (FIBA Europe Cup) është Prishtina. Skuadra e kryeqendrës së Kosovës, u përball të mërkurën në Turqi me ekipin e Pënar Karshijakas, në kuadër të grupit I, ku u mposht me shifrat 107-85. Ishte disfata e dytë për ekipin e Prishtinës në 3 takime të luajtura. Më parë skuadra kosovare kishte humbur ndaj Vyrzburgut të Gjermanisë, kurse në ndeshjen e dytë kishte mundur hungarezët e Zolnoki Olajit.
Ndeshja në Turqi nuk nisi aspak mirë për Prishtinën e cila humbi 10-minutëshin e parë 20-29. Në 10-minutëshin e dytë shtatlartët shqiptarë të Prishtinës e përmirësuan ndjeshëm lojën, por sërish humbën 22-25. Në pushimin ndërmjet dy gjysmave, turqit e Karshijakës kryesonin me shifrat 54-42. Më e barazpeshuar ishte pjesa e 3-të e ndeshjes, e cila u fitua me vetëm një pikë më shumë nga turqit, 22-21. Por 10-minutëshi i fundit ishte krejtësisht në favor të vendasve, që fituan 31-22.
Krejt ndeshja përfundoi me rezultatin 107-85 në favor të Karshijakës turke, e cila ngjitet në vend të dytë, pas Vyrzburgut gjerman, që mban vendin e parë. Gjermanët kanë 3 fitore dhe mbajnë kreun e grupit I me pikë të plota, 6. Ata mposhtën në mbrëmje Zolnoki Olajin me shifrat e thella 118-71. Në vend të dytë janë turqit e Pënar Karshijakas me 5 pikë, në vend të 3-të Prishtina me 4 pikë, e në vend të fundit hungarezët e Zolnoki Olajit me 3 pikë.
Pënar Karshijaka – Prishtina 107-85
(29-20, 25-22, 22-21, 31-22)
Renditja:
Nr. Skuadra N F H Pikë
- Vyrzburg 3 3 0 6
- Karshijaka 3 2 1 5
- Prishtina 3 1 2 4
- Zolnoki Olaj 3 0 3 3
