ASNN – Në derbin e dytë të Durrësit në këtë sezon të basketbollit të meshkujve, Teuta ndeshet të shtunën me Goga Basketin, tanimë nën drejtimin e trajnerit Miodrag Baletiç. “Ne po stërvitemi fort çdo ditë dhe kjo është gjëja e parë që unë u kam kërkuar lojtarëve të mi dhe jua kam bërë të qartë se vetëm kështu mund të arrijmë pastaj të fitojmë ndeshje”, – ka deklaruar ai.

“Përgjithësisht jam i kënaqur me ekipin”, – ka shtuar 70-vjeçari, për të cilin Goga Basket është një kundërshtar që paraqet shumë vështirësi. “Unë nuk i njoh lojtarët e Goga Basket dhe kjo më krijon pak vështirësi sa u përket përgatitjeve për këtë ndeshje, por ne do të përgatitemi sa më mirë të mundemi dhe të jemi në gjendjen tonë më të mirë atë ditë”, – ka theksuar Baletiçi.

Për këtë arsye, trajneri malazez kërkon nga lojtarët e Teutës, të mos e ulin ritmin dhe thotë: “Ajo që është e sigurt është se, nëse vazhdojmë kështu siç po stërvitemi, me këtë ritëm dhe përkushtim, suksesi është i garantuar, jo vetëm ndaj Goga Basket, por ndaj çdo kundërshtari.” Takimi Goga Basket-Teuta luhet të shtunën, duke nisur nga ora 16:00.