ASNN – Shqipëria e basketbollit për meshkuj nis nesër pjesëmarrjen në një nga dy turnetë miqësorë në përgatitje për Eliminatoret e Evropianit të 2017-ës. Duke folur ekskluzivisht për Televizionin Shqiptar, trajneri qipriot i kuqezinjve, Antonis Kostandinides, ka vlerësuar përgatitjet për këto Eliminatore dhe pritshmëritë nga këto dy turne. Ndeshjet e Kombëtares kuqezi do të sillen për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar, pas marrëveshjes së mirëkuptimit të nënshkruar midis transmetuesit publik dhe Federatës Shqiptare të Basketbollit.

Ka punuar për dy javë me skuadrën dhe ajo që vlerëson ka qenë përkushtimi i saj. “Duhet të themi se jam shumë i lumtur për përpjekjen, për energjinë dhe pasionin që lojtarët e mi kanë shpalosur, – ka thënë Kostandinides. – Për mua, kjo është e rëndësishme. Jam i kënaqur, sepse i kam parë lojtarët e mi, ditë pas dite, që të përshtaten gjithnjë e më tepër me etikën e punës që unë kërkoj që ata të tregojnë në parket.” Trajneri i Kombëtares shqiptare të basketbollit, thekson se pjesëmarrja në dy turne miqësorë, në Qipro dhe Estoni, janë një ndihmesë e madhe.”

“Do të jenë mjaft të dobishme, pasi, si fillim, do t’ju japin mundësi lojtarëve të krijojnë një ide konkrete se me çfarë do të përballen në ndeshjet zyrtare, në Eliminatore, – ka thënë qiprioti i stolit kuqezi të koshit të meshkujve. – Ndeshjet miqësore janë shumë të rëndësishme, pasi nuk mund të shkosh në një ndeshje zyrtare thjesht duke u mbështetur tek stërvitja. Prandaj, unë propozova që të shkojmë në këto dy turne miqësorë, pasi ato na japin mundësinë të përballemi me kundërshtarë me nivel të përafërt me Malin e Zi, Gjeorgjinë dhe Sllovakinë. ”