ASNN – Trajneri i Partizanit vlerëson bardheblutë, flet për amerikanizimin dhe duelin e kryeqytetit me Durrësin. Partizani ndeshet të shtunën në derbin e koshit të kryeqytetit me Tiranën, një kundërshtar të cilin trajneri i të kuqve, Arben Fagu, e vlerëson lart.
Të kuqtë kryeqytetas janë përforcuar edhe me 3 lojtarë amerikë në këtë gjysmë të dytë të sezonit, një hap që sipas Fagut, u bë i nevojshëm. Titulli i këtij viti në basketbollin e meshkujve është shndërruar në një betejë midis Durrësit dhe Tiranës.
Dhe, duke folur për Rrjetin e Radio-Televizionit Shqiptar, trajneri i Partizanit nuk e fsheh se mbështet kryeqytetin. Takimi i javës së 13-të të Superligës së basketbollit të meshkujve, midis Partizanit dhe Tiranës, do të sillet për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, duke nisur nga ora 18:00.
