ASNN – 40 milionë euro pagë në sezon për të mbajtur larg klubet e tjera të mëdha të Evropës, por edhe ofertat e çmendura nga Kina e largët. Kjo është oferta që Barcelona i ka bërë Lionel Mesit, që ta bindë atë të firmosë një kontratë të re, pas asaj aktuales që skadon më 2018-ën. Ai është padyshim një nga lojtarët më të mëdhenj në botë dhe Barcelona po bën çmos që ta bindë Lionel Mesin që ta zgjasë kontratën.
Drejtuesit e klubit katalan ia kanë dalë me sukses të firmosin kontrata të reja me Nejmarin dhe Luis Suarezin. Por, deri më tani, ata kanë dështuar ta bëjnë të njëjtën gjë edhe me Lionel Mesin, që plotëson kështu 3-shen e frikshme të sulmit, të mbiquajtur MSN. Por, sipas të përditshmes sportive madrilene, “AS”, drejtuesit e ekipit të “Kamp Nou”-t kanë vendosur t’i ofrojnë Mesit një pagë marramendëse.
Dhe, jo pak, por plot 40 milionë euro në sezon për ta bindur atë që ta zgjasë kontratën. Mesi ka një kontratë me Barcelonën deri në vitin 2018. Por, hezitimi për të firmosur një kontratë të re ka bërë që disa klube të mëdha evropian dhe nga Superliga e Kinës të tentojnë transferimin e argjentinasit në radhët e tyre. Shifrat e ofruara, qoftë për Mesin, qoftë për Kristiano Ronaldon kanë qenë të frikshme, në kufinjtë e 300 milionë eurove.
