ASNN – Shqipëria e futbollit mund të ketë shkruar historinë e sportit këtë verë, por një tjetër Shqipëri, ajo e atletikës ka shkuar edhe më lart, duke siguruar, për të parën herë në histori, një titull të nënkampiones së Evropës. Bëhet fjalë për atleten e mirënjohur, Luiza Gega, e cila ka marrë medaljen e argjendtë në garën e 3,000 metrave me pengesa në Kampionatin Evropian të Atletikës, që po mbahet në Amsterdam.

Kishte premtuar një medalje kontinentale në Amsterdam dhe e ka mbajtur premtimin e saj, duke arritur të marrë medaljen e argjendtë ndonëse ka garuar për herë të parë në disiplinën e 3,000 metrave me pengesa. Luiza Gega është shpallur nënkampione e Evropës në këtë disiplinë të re për të, duke shkruar kështu me gërma të arta emrin e saj në historinë e sportit shqiptar.

Atletja shtatshkurtër ka bërë një garë të shkëlqyer në pistën e Amsterdamit, duke qenë me grupin e konkurrenteve kryesuese në xhirot e para dhe duke vijuar të ruajë ritmin me gjermane Krause në xhirot e fundit, çka i ndihmoi të dyja sportistet të krijonin një epërsi të dukshme ndaj grupit tjetër të garueseve. Megjithëse atletja gjermane ishte dukshëm më superiore, duke u shkëputur në 400 metrat e fundit, Gega, e cila ka garuar pavarsisht një dëmtimi, nuk është dorëzuar.

Ajo ka marrë vendin e dytë në finish, me kohën 9 minuta, 28 sekonda e 52 sekonda, 10 sekonda prapa gjermanes së vendit të parë, por afro 7 sekonda para turkes së vendit të 3-të. Përfundimisht, një medalje e argjendtë dhe një titull i nënkampiones së Evropës, që premton mjaft për Olimpiadën e Rios në gusht.