ASNN – Nikolli në 1,500 m, Gega, në 3,000 m dhe Qerama, në 800 m, për të rishkruar kohët. 3 prej sportistëve më të spikatur për momentin në atletikën shqiptare do të synojnë në ditët e fundit të këtij muaji, të rishkruajnë rekordet në disiplinat e tyre. Kështu, David Nikolli në 1,500 metra, Luiza Gega, në 3,000 metra dhe Eraldo Qerama, në 800 metra, do të kërkojnë të thyejnë rekordet e mbajtur prej tyre, kur të zbresin në pistën kontinentale në ditët në vijin.
Atletika shqiptare ka mbyllur vitin 2019 me një numër rekordesh të thyera, por edhe arritje historike, siç ishte sigurimi për herë të parë nga një sportiste apo sportist kuqezi i vendit në finalen e një disipline të “Mbretëreshës së Sporteve”. Këtë e arriti pikërisht Luiza Gega, e cila, jo vetëm që garoi në finalen e 3,000 metrave me pengesa në Botërorin e Dohas, por edhe u rendit e 9-ta në planet në këtë disiplinë.
Dhe është pikërisht shtatshkurtëra shqiptare, e cila e ka hedhur vështrimin drejt Olimpiadës së verës në Tokio, e cila do të synojë një tjetër rekord kur të marrë pjesë në Mitingun Ndërkombëtar të Karlsruhes në Gjermani, që do të mbahet më 31 janar 2020 dhe që është një nga stacionet e “Diamond Ligës” Dimërore të Atletikës. 31-vjeçarja,e cila prej një muaji e gjysmë stërvitet në Kenia, do të synojë të thyejë aty rekordin e garës së 3,000 metrave në salla të mbyllura, që është 8 minuta, 52 sekonda e 53 të qindtat e që mbahet po prej saj.
Ndërkaq, edhe atleti David Nikolli, i cili gjithashtu është stërvitur në Kenia për disa javë, për të vijuar më pas në Portugali, do të synojë rekordin e tij në disiplinën e 1,500 metrave në salla të mbyllura, kur të marrë pjesë në Mitingun Ndërkombëtar të Ankonës në Itali. Në këtë garë, që zhvillohet më 25 janar 2020, 25-vjeçari do të synojë të përmirësojë rekordin e tij të vendosur plot një vit më parë në Padova, me kohën 3 minuta, 49 sekonda e 44 të qindtat.
Përmirësimin e rekordit të tij do ta synojë pak ditë më vonë, më 1 shkurt 2020, edhe atleti i 800 metrave, Eraldo Qerama, i cili do të marrë pjesë në Mitingun Ndërkombëtar të Vienës. Pikërisht një vit më parë, po në kryeqytetin austriak, ai pati regjistruar kohën 1 minutë, 48 sekonda e 96 të qindtat, çka përfaqësonte një përmirësim prej saktësisht 2 sekondash e 54 të qindtash të rekordit të tij të mëparshëm, të vendosur në 2013-ën.
