ASNN – Atleti shkodran pëson tërheqje muskulore, nuk garon në Evropianin e Sallave të Mbyllura. Izmir Smajlaj është tërhequr në çastet e fundit nga garimi në disiplinën e kërcimit së gjati në Kampionatin Evropian të Atletikës në Sallave të Mbyllura, që po mbahet në Skoci. Ka ardhur si një rrufe në qiell të pastër, teksa pritshmëritë ishin shumë të larta. Por në fund ka lënë një shije të hidhur, sepse Izmir Smajlaj është tërhequr në çastet e fundit nga garimi në disiplinën e kërcimit së gjati në Kampionatin Evropian të Atletikës në Sallave të Mbyllura, që po mbahet në Skoci.
Një gjë të tillë e ka pohuar ekskluzivisht për Rrjetin e Radio-Televizionit Shqiptar Presidenti i Federatës Shqiptare të Atletikës, Gjergj Ruli, i cili nëpërmjet një mesazhi të shkurtër telefonik, ka sqaruar edhe rrethanat që çuan në këtë vendim të papritur. “ Izmirin e tërhoqa pa bërë garë, sepse para 6 ditësh ka pësuar një tërheqje”, – shkruan në sms-në e tij kreu i organizmit që qeveris atletikën, i cili vijon: “Është e pamundur! Megjithëse kofshën rrahëse e fashuam tek mjekët italianë, ngacmimi është i madh. Nëse do të rrezikonim, është 100% e sigurt që do të këpuste muskujt.”
“Përpara kemi gara të tjera dhe Kampionatin Botëror!”, – përfundon Ruli. Në fakt, Smajlaj nuk ka arritur të rigjejë paraqitjen e para dy viteve, kur u shpall “kampion” i Ballkanit e më pas i Evropës në Salla të mbyllura dhe së fundmi, nuk shkoi dot më larg se vendi i dytë në Kampionatin Ballkanik, të mbajtur në Stamboll në mes të shkurtit. Aty, atleti shkodran, që stërvitet nga vetë Ruli, arriti në kërcimin e tij më të mirë vetëm 7 metra e 70 centimetra, teksa bëri edhe 3 faulla. Smajlaj mori medaljen e argjendtë dhe titullin e nënkampionit të Ballkanit.
Ai ishte 4 cm pas rumunit të vendit të parë, ndërsa kreu i FSHA-së ia mveshi këtë paraqitje një gjendjeje gripale. Ndonëse në intervistën dhënë Rrjetit të Radio-Televizionit Shqiptar, pak ditë para garës, Ruli nuk ka folur për dëmtime apo probleme të sportistit, duke patur madje shpresa të mëdha për Smajlajn, të premten në mëngjes gjithçka ka rezultuar ndryshe dhe një nga shpresat e mëdha të Shqipërisë në këtë Evropian ka rezultuar zhgënjim.
