ASNN – Shqiptarëve do t’ju duhet të zgjasin akoma pritjen për vendimin e Gjykatës së Arbitrazhit Sportiv (CAS), në lidhje me ndeshjen Serbi-Shqipëri të 14 tetorit të kaluar. Organi më i lartë i drejtësisë sportive ka shtyrë për në datën 12 qershor vendimin e shumëpritur në lidhje me takimin e vlefshëm për Eliminatoret e “Francë 2016”.

Federata Shqiptare e Futbollit ka konfirmuar nëpërmjet një komunikate për shtyp se CAS-i ka vendosur që të shpallë verdiktin për takimin ku huliganët serbë zbritën në fushë duke goditur edhe futbollistët shqiptarë të cilët u bënë më pas viktimë edhe e dhunës nga ana e personelit të sigurisë në stadiumin e Partizanit të Beogradit.

Në komunikatën e FSHF nuk bëhen të ditura motivet e shtyrjes së vendimit që vetë Këshilli i Arbitrazhit Sportiv fillimisht kishte bërë të ditur se do të merrej në datën 29 maj 2015, këtë të premte. Në këtë mënyrë duke përjashtuar ndonjë të papritur tjetër shqiptarët do të njihen me vendimin e shumëpritur në 12 qershor 2015, vetëm një ditë para takimit me Francën në “Elbasan Arena”.

CAS-i ka kërkuar kohë për marrjen e vendimit duke shfrytëzuar deri në limit afatin për dhënien e tij, duke qenë se në 13 qershor 2015 do të luhen edhe takimet e tjera të grupit, Armeni-Portugali dhe Danimarkë-Serbi dhe do të jetë e rëndësishme që skuadrat të jenë në dijeni të klasifikimit.

Shqipëria shpreson të marrë në “CAS” atë që e quan “të drejtën e mohuar” nga Komisionet Disiplinore të FIFA-s, të cilat vendosën që t’i japin ndeshjen në tavolinë me rezultatin 3-0 Serbisë, të cilës iu hoqën njëkohësisht 3 pikët nga klasifikimi i Grupit I për shkak të akteve të dhunës. Në Arbitrazhin e Lozanës, Shqipëria kërkon marrjen e tre pikëve që do të rrisnin ndjeshëm shanset e ekipit të drejtuar nga De Biazi për të siguruar kualifikimin e drejtpërdrejtë për në “Francë 2016”.