ASNN – Të martën, veprimtaria më prestigjioze e klubeve të Evropës, Liga e Kampioneve, është rikthyer me takimet e para të dy turit të 16-shes. Ndërkaq, takimet e para të dy çifteve të fundit luhen të mërkurën dhe Mançester Junajtid do të ndeshet në Madrid me Atletikon, në ndeshjen që do të vijë për sportdashësit drejtpërdrejt nga Rrjeti i Radio-Televizionit Shqiptar.

Liga e Kampioneve është rikthyer të martën me takimet e para të dy çifteve të tjera të turit të 16-shes dhe, në Spanjë, Juventusi ka goditur që në aksionin e parë të ndeshjes, duke gjetur rrugën e rrjetës me anë të përforcimit më të fundit të merkatos së dimrit, serbit Dushan Vllahoviç. Ai ka goditur zgjuarsisht dhe befasisht brenda zonës, duke mposhtur mbrojtjen dhe portierin vendas dhe duke i kaluar italianët në epërsi.

Me këtë epërsi minimale do të mbyllen 45 minutat e para, por ato të dytat do të shohin Vijarealin më kërkues dhe është Pareho që do të përfitojë nga vendosja e gabuar e mbrojtjes juventine dhe do të përcjellë topin në rrjetë, duke fiksuar edhe rezultatin përfundimtar në barazim 1-1. Ndërkaq, edhe në Londër, Kai Havertz ka rrezikuar fillimisht në minutën e 7-të, por duke korrigjuar shënjestrën menjëherë më pas, teksa topin e ardhur nga goditja e këndit e ka përcjellë në rrjetë, duke e kaluar kështu Çellsin në epërsi.

Ndonëse Lila do të reagojë dhe do të ngulmojë në vijim, pjesa e parë do të mbyllet me epërsinë e kampionëve në fuqi të Evropës, që do të gjejnë edhe golin e dytë pas një ore lojë, teksa Pulishiç ruan gjakftohtësinë dhe përshëndet rrjetën. Çelsi mposht kështu 2-0 Lilën, ndërsa takimet e para të dy çifteve të fundit luhen të mërkurën dhe Benfika pret Ajaksin dhe Mançester Junajtid do të ndeshet në Madrid me Atletikon, në ndeshjen që do të vijë për sportdashësit drejtpërdrejt në Rrjetin e RTSH-së.