ASNN – Futbolli shqiptar vazhdon të ketë një vëmendje të veçantë nga ana e UEFA-s, kjo falë Skënderbeut dhe skuadrës kombëtare, që kanë arritur deri në fazën e grupeve të Ligës së Evropës dhe në finalet e “Euro 2016”. Për këtë arsye, organizmi që qeveris futbollin evropian ka bërë një pasqyrim të të gjitha paraqitjeve të futbollistëve shqiptarë në Evropë, duke publikuar një sërë statistikash. Sipas faqes zyrtare në Internet, uefa.com, lojtari shqiptar që ka zhvilluar më shumë ndeshje në Ligën e Kampioneve është Besnik Hasi, aktualisht trajner i Anderlehtit, me 35 sfida të tilla.
Ai ndiqet nga Altin Haxhi, me 21, dhe Lorik Cana, me 20. Shënuesi më i mirë shqiptar në rang klubesh në veprimtarinë më prestigjioze të klubeve të kontinentit, ku përfshihen edhe sfidat eliminatore, është Hamdi Salihi me 6 gola, i ndjekur nga Devi Muka me 5 dhe Alban Bushi me 4. Në total, në të gjitha veprimtaritë evropiane për klube, futbollisti që ka zhvilluar më shumë ndeshje është Lorik Cana, me 56 të tilla. Më pas vjen Admir Teli dhe Ansi Agiolli, respektivisht me 48 dhe 45 ndeshje. Përsa u përket shënuesve, Hamdi Salihi është ai që ka shënuar më shumë gjithsej, 14 gola.
Shkodrani ka lënë pas Kliton Bozgon dhe Indrit Fortuzin. Por UEFA ka nxjerrë edhe disa statistika të tjera. Kështu, Igli Tare është i vetmi futbollist shqiptar që ka luajtur në finalen e një veprimtarie evropiane, në vitin 2001, kur Breshia e tij luajti në finalen e Kupës Intertoto me Paris SG-nç, ndeshje e fituar nga kjo e fundit falë golave në fushë kundërshtare. I pari lojtar që ka luajtur në fazën e grupeve në Ligën e Kampioneve është Bledar Kola me Panathinaikosit, në shtator 1998. Ndërsa i pari trajner shqiptar që drejtoi një skuadër në fazën e grupeve të Ligës së Kampioneve është Besnik Hasi me Anderlehtin, sezonin e kaluar.
