ASNN – Mbrëmjen e së mërkurës u luajtën dy ndeshje të Ligës së Kampioneve, ku në Londër Totenhemi priti Borusian e Dortmundit, kurse në Amsterdam Ajaksi priti Realin e Madridit. Në të dyja takimet pati emocione dhe spektakël, por në fund fituan skuadrat favorite, që hedhin një hap drejt çerekfinaleve. Kështu, në Londër Totenhemi arrriti një fitore të thellë 3-0 ndaj Borusias së Dortmundit, duke e vënë kualifikimin në “shinat” e duhura.
Anglezët vuajtën shumë në këtë ndeshje, pasi Dortmundi luajti më mirë në pjesën e parë dhe iu afrua disa herë golit. Por portieri Hugo Lloris në momente decizive bëri pritje spektakolare duke evituar gola të sigurt. Në pjesën e dytë Totenhemi e nisi menjëherë me gol, pasi koreano-jugori Min Son realizoi në kohën dhe vendin e duhur, duke i hapur shtegun një fitoreje të madhe të skuadrës londineze. Dortmundi u hodh në sulm duke kërkuar golin e barazimit dhe ushtroi shumë presion në zonën kundërshtare.
Por strategjia e Totenhemit për të shfrytëzuar kundërsulmin në minutat e fundit të ndeshjes sollën edhe dy gola të tjerë, duke e shtangur dhe dorëzuar ekipin gjerman. Kështu, në minutën e 83-të Jan Vertonghen shënoi golin e dytë dhe, vetëm 3 minuta më pas, e 4 minuta para fundit të kohës së rregullt, ishte radha e Fernando Jorentes të shënojë golin e tretë, e përfundimisht Totenhemi fitoi 3-0 ndaj Borisias së Dortmundit, duke bërë që çerekfinalet të jenë më afër për të.
Gjermanët zhgënjejnë në fund të ndeshjes dhe tani shohin pengesë të mëdha për objektivin e kualifikimit, pavarësisht se dueli i kthimit do të luhet në “Signal Iduna Park” të Dortmundit.
